سورت حجر — آیت 3

د کلمو معناګانې:

• ذَرْهُمْ: پرېږده دوى، ورته مه وایه.
• يَتَمَتَّعُوا: په دنیوي خوندونو کې خوند واخلي.
• يُلْهِهِمُ الْأَمَلُ: اوږدې هیلې دوى له حق څخه غافله کړي.
• فَسَوْفَ يَعْلَمُونَ: نو ژر به پوه شي (د خپل عمل پایلې ته).

تفسیر:

اى محمده! ته دا كسان چې ستا د رښتینولۍ او قران منكر دي، پرېږده چې دوى دې دنيا كې د څارويو په شان وخوري، او له خپلو نفساني خواهشاتو او د دنيا له خوندونو څخه خوند واخلي، او اوږدې هیلې دې دوى له ایمان او نېك عمل څخه غافلې كړي. دوى داسې ګومان كوي چې په دې دنيا كې به تل پاتې وي، نو دوى د آخرت او د خپل بد انجام په اړه فكر نه كوي. خو ژر به دوى پوه شي چې د دوى دا ژوند او عملونه څومره تاواني وو، كله چې د قیامت په ورځ د خپل كفر او ګناهونو سزا وویني او د الله په وړاندې ودرېږي، نو هلته به دوى د خپلې تېروتنې احساس وكړي، خو بیا به ګټه نه لري.

فايدې:

1. دا آیت د كافرانو او منكرانو لپاره یو ډول ګواښ او وېرول دى، چې دوى دې له خپلې غفلت او سركشۍ څخه خبر شي.
2. په دې آیت كې دا خبره ښكاره ده چې دنیوي خوندونه او اوږدې هیلې د انسان لپاره تر ټولو لوی خطر دى، ځكه چې دوى له آخرت او عبادت څخه غافلوي.
3. مومنان باید له اوږدو هیلو څخه ځان وساتي او تل دې د آخرت په فكر كې وي، ځكه چې دنیا لنډه او فاني ده.
4. دا آیت د صبر او زغم درس راكوي، چې د حق د تبلیغ په لاره كې باید له منكرانو سره په نرمۍ او برداشت سره چلند وكړو، او د دوى چارې الله ته پرېږدو، ځكه چې هغه ښه حسابوونكى دى.