سوڕەتی ئه‌نبیا — ئایه‌ت 46

معاني الكلمات:

• نَفْحَةٌ: به‌شێک یان تۆزێک له سزای خوا، واتا به‌شێکی که‌م له عه‌زاب.
• یا ویلنا: هاوار و داخ و په‌شیمانی، واتا: هاوار بۆ له‌ناوچوون و تیاچوون.

تەفسیری ئایەتەکە:

ئه‌ی پێغه‌مبه‌ر (صلى الله عليه وسلم)، ئه‌و کافرانەی که به‌گاڵته‌وه داوای عه‌زابی خوایان ده‌کرد و په‌له‌یان ده‌کرد، سوێند به‌خوا ئه‌گه‌ر به‌شێکی که‌می عه‌زابی په‌روه‌ردگاری تۆیان بۆ بێت له‌م دنیایه‌دا، یان له‌قیامه‌تدا، ئه‌و کاته به‌ده‌م هاوار و داخه‌وه ده‌ڵێن: "هۆی له‌ناوچوون بۆ ئێمه‌! به‌ڕاستی ئێمه‌ که‌سێکی سته‌مکار بووین" — سته‌میان له خۆیان کرد به‌وه‌ی که‌هاوڵیان بۆ خوا دانا و باوه‌ڕیان به‌پێغه‌مبه‌ر (صلى الله عليه وسلم) نه‌هێنا و ئایینه‌که‌یان به‌درۆزانی.

ئه‌و کاته‌ی عه‌زابی خوا دێته‌سه‌ریان، ڕاستی بۆیان ده‌رده‌که‌وێت و دان به‌سته‌مکاری خۆیاندا ده‌نێن، به‌ڵام ئه‌و دانپێدانانه‌ی سوودێکی نیه‌، چونکه‌کاتێک عه‌زاب دێت، ته‌وبه و په‌شیمانی قبوڵ نابێت.

په‌ند و ئامۆژگاری:

ئه‌ی خوێنه‌ری به‌ڕێز! ئهم ئایەته‌ په‌ندێکی گه‌وره‌ی تێدایه‌ بۆ ئێمه‌: که‌سی سته‌مکار، هه‌رچه‌نده‌ له‌م دنیایه‌دا خه‌ریکی خۆشی و سهرکه‌وتوویی بێت، به‌ڵام له‌کاتی تهنگی و گیروگرفتی دا، ویژدانی ده‌خه‌بهرێت و دان به‌سته‌مکاری خۆیدا ده‌نێت. ئێمه‌ ده‌بێت له‌م ژیانه‌دا خۆمان له سته‌م بپارێزین — سته‌م له خۆمان، سته‌م له خه‌ڵکی، و سته‌م له خوا به‌وه‌ی که‌گوناه و یاخیبوون ده‌که‌ین. خوای گه‌وره‌ زۆر به‌به‌زه‌یی و میهره‌بانه‌، ده‌رگای ته‌وبه‌ی کرده‌وه‌ بۆ هه‌موو گوناهبارێك، به‌ڵام ده‌بێت په‌شیمان بین و زوو بگه‌ڕێینه‌وه‌ بۆ لای، به‌ر له‌وه‌ی عه‌زابه‌که‌ی بێت و ئه‌و کاته‌ ته‌وبه‌مان قبوڵ نه‌کرێت.