فرقان سۈرىسى — ئايەت 19

1) ئايەتتىكى چۈشەندۈرۈشكە موھتاج سۆزلەر:

• كَذَّبُوكُم: سىلەرنى ئىنكار قىلدى، يالغانغا چىقاردى.
• صَرْفًا: دەپئى قىلىش، يەنى ئازابنى ئۆزۈڭلاردىن قايتۇرۇش، بىر تەرەپ قىلىش.
• نَصْرًا: ياردەم، نۇسرەت.
• يَظْلِم: زۇلۇم قىلىدۇ، بۇ يەردە شىرك قىلىش مەنىسىدە.

2) ئايەتنىڭ تەپسىرى:

ئى مۇشرىكلار! سىلەر ئاللاھنى قويۇپ چوقۇنغان بۇتلىرىڭلار ھەمدە ئۆزۈڭلار ئىبادەت قىلغان مەخلۇقلار، سىلەرنىڭ ئۇلار ھەققىدىكى «ئۇلار بىزگە شاپائەت قىلىدۇ، بىزنى ئاللاھقا يېقىنلاشتۇرىدۇ» دېگەن دەۋايىڭلارنى ئىنكار قىلدى ۋە يالغانغا چىقاردى. ئەمدى سىلەر ئۆزۈڭلاردىن ئازابنى قايتۇرالمايسىلەر، ئۆزۈڭلارغا ياردەممۇ قىلالمايسىلەر. چۈنكى سىلەر ۋە سىلەر چوقۇنغان بۇتلار ھەممىڭلار ئاجىزسىلەر، پايدا كەلتۈرۈش ياكى زىياننى دەپئى قىلىش قولۇڭلاردىن كەلمەيدۇ.

ئى ئىنسانلار! بىلىڭلاركى، كىمكى ئاللاھقا شىرك كەلتۈرۈپ ئۆزىگە زۇلۇم قىلسا، ئاللاھ ئۇنىڭغا ئىنتايىن چوڭ ئازابنى تېتىتىدۇ. بۇ ئازاب دوزاخ ئازابىدۇر. ئاللاھ تائالا ھەر قانداق شىرك ۋە كۇفرىدىن پاك ۋە ئالىيدۇر.

ئى قېرىنداشلار! بۇ ئايەت بىزگە شۇنى ئەسكەرتىدۇكى، پەقەت ئاللاھلا ئىبادەتكە لايىقتۇر. ئۇنىڭدىن باشقا ھەر قانداق نەرسىگە چوقۇنۇش، ئۇلاردىن ياردەم تىلەش پۈتۈنلەي بىھۇدە ۋە زىيانلىقتۇر. ئاللاھقا يۆنەلگەن كىشى ھەرگىز زىيان تارتمايدۇ، ئۇنىڭ ياردىمى ھەمىشە يېقىندۇر. كېلىڭلار، قەلبىمىزنى پەقەت ئاللاھقا باغلايلى، ئۇنىڭ بىرلىكىگە ئىمان كەلتۈرۈپ، شىركىتىن ساقلىنايلى. ئاللاھ بىزنى ھىدايەت قىلسۇن ۋە دوزاخ ئازابىدىن قۇتۇلدۇرسۇن. ئامىن.