Suuratu Ash-Shu'ara — Aaya 105

1. Maanaaji kelme ɗe ngoni haaja e faamninde nder ndee aaya:

• "كَذَّبَتْ": fennude, wostude goonga.
• "قَوْمُ": yimɓe, lenyol, mofte.
• "نُوحٍ": Annabi Nuuhu (jammo e makko).
• "الْمُرْسَلِينَ": Nulaaɓe ɓen fow, ɓe Alla nuli.

1. Firo aaya ndee:

Yimɓe Annabi Nuuhu (jammo e makko) fenni nulaaɓe ɓen fow nde ɓe fenni Annabi Nuuhu. Sabu kala mo fenni nulaaɗo gooto, haray o fennii nulaaɓe ɓen fow, tawde kala nulaaɗo no yamira jaɓgol nulaaɓe ɓen fow. Ɗum ko sabu Annabi Nuuhu noddii yimɓe makko wonnde yo ɓe hulu Alla, ɓe accu rewugol goɗɗum si wanaa Kanko. O maakani ɓe wonnde ko o nulaaɗo hoolaaɗo, omo yottina ɓe ko Alla nuli mo e mun. O yamiri ɓe ɓe jaɓu Alla ngam hisnude hoore maɓɓe e lepte Alla, ɓe ɗofto mo e ko o yamiri ɓe kon, woni rewugol Alla tun. O maakani ɓe kadi wonnde o naamnaa ɓe njoɓdi e yottinnde ndee, njoɓdi makko ndi woni ko e Joomi winndere ndee, taguɗo kala huunde, ko Kanko woni e jogaade tagu makko fow. O wi'i ɓe yo ɓe hulu lepte Makko, ɓe ɗofto mo e yamirooje makko, ɓe woɗɗitoo e haɗaaɗi makko.

1. Nafaaji ɗi ndee aaya waajnata:

• Ndee aaya no holliri wonnde fennugol nulaaɗo gooto no foti fennugol nulaaɓe ɓen fow, tawde diina oo ko gootal, nelaaɓe ɓen fow ko e laawol gootol ɓe ngardi.
• Ndee aaya no waajna wonnde jaɓgol Alla e ɗoftaare nelaaɓe ɓen ko hisnugol e lepte, ko ɗum woni laawol kisal e jam.
• Ndee aaya no holliri wonnde nelaaɓe ɓen fow ko hoolaaɓe e yottinnde nelal Alla, ɓe naamnaa njoɓdi e yimɓe ɓen, njoɓdi maɓɓe ndi woni ko e Alla tun.
• Ndee aaya no waajna wonnde hulde Alla e ɗoftaare nelaaɓe ɓen ko ɗum addanta neɗɗo nafa e aduna e laakara.
• Ndee aaya no holliri wonnde Alla ko Joomi winndere ndee fow, ko Kanko jogiiɗo tagu makko, ko Kanko tun foti rewde.