سورت آل عمران — آیت 189

د کلمو معناګانې:

• مُلْكُ: بادشاهي، واکمني.
• السَّمَاوَاتِ وَالْأَرْضِ: اسمانونه او ځمكه.
• قَدِيرٌ: پر هر څه توانا، بشپړ قدرت لرونكى.

تفسير:

الله جل جلاله ته يواځې د اسمانونو او ځمكې بادشاهي او واكمني ده، او هر هغه څه چې په دواړو كې دي، د هغه په ملكيت او واك كې دي. هغه د دوى خالق، مالك او مدبر دى؛ نه يواځې د پيدا كولو په لحاظ، بلكې د تدبير او حكومت په لحاظ هم. هيڅوك د هغه په واكمنۍ كې شريك نه دى، او نه د هغه له حكم پرته كوم څيز واقع كېږي. الله تعالی پر هر شي بشپړ قدرت لري؛ نو هغه پر دې قادر دى چې له كافرانو او سركشو بندګانو سره حساب وكړي، دوى ته سزا وركړي، او د خپلو نېكو بندګانو ثواب او بدله وركړي. د هغه قدرت هيڅ شي ته محدود نه دى، او هيڅ څيز د هغه له ارادې بهر نه دى.

فايدې:

• دا چې د كايناتو بادشاهي يواځې د الله ده، نو بندګان بايد خپل كارونه يواځې هغه ته وسپاري او له هغه پرته له بل چا نه ووېرېږي.
• د الله پر قدرت ايمان، د بندګي په زړه كې د توكل او ډاډ احساس پيدا كوي، ځكه چې هغه پوهېږي چې هر څه د الله په لاس كې دي.
• دا چې الله پر هر شي قادر دى، نو بندګان بايد د هغه له عذابه ووېرېږي او د هغه د رحمت هيله ولري، ځكه چې هغه پر بخښنې او رحمت هم بشپړ قدرت لري.
• دا آيت د مسلمانانو لپاره د تسليت او ډاډ سرچينه ده، په ځانګړې توګه كله چې له مشكلاتو او ظلمونو سره مخ كېږي، ځكه چې دوى پوهېږي چې بري او شكست ټول د الله په لاس كې دي.