Sura Al-Ma'ida — Aya 9

Maana za maneno:

• Wa'ad Allahu: Mwenyezi Mungu ameahidi.
• Amanu: Walioamini kwa moyo na kusadikisha kwa dhati.
• Wa 'amilu as-salihati: Na wakafanya matendo mema yanayolingana na mafundisho ya Uislamu.
• Maghfirah: Msamaha wa dhambi na makosa.
• Ajrun 'adhim: Malipo makubwa ambayo ni Pepo.

Tafsiri ya Aya:

Mwenyezi Mungu Aliyetukuka ameahidi wale walioamini kwa dhati katika Mwenyezi Mungu na Mtume wake, na wakafanya matendo mema yanayothibitisha Imani yao, kwamba watapata msamaha wa dhambi zao zote, na malipo makubwa yasiyopimika, ambayo ni kuingia Pepo na kufurahia neema zake za milele. Ahadi hii ni ya uhakika kutoka kwa Mwenyezi Mungu, ambaye hawezi kuvunja ahadi yake, kwani Yeye ni Mwaminifu kwa ahadi zake, na hakuna anayeweza kumzuia kutimiza alivyoahidi. Ahadi hii inajumuisha wale wote wanaoamini na kufanya wema, bila kujali nyakati au nafasi zao, na inathibitisha kwamba Imani na matendo mema ndio njia ya kufikia furaha ya duniani na Akhera.

Faida Zinazotokana na Aya:

1. Aya hii inatia moyo waumini kushikamana na Imani na matendo mema, kwani ahadi ya Mwenyezi Mungu ni ya uhakika na isiyobadilika.
2. Inaonyesha ukarimu wa Mwenyezi Mungu kwa waja wake, kwamba anawasamehe dhambi zao na kuwapa malipo makubwa zaidi ya yale wanayostahili.
3. Inafundisha kwamba Imani pekee haitoshi, bali lazima iambatane na matendo mema, ndipo mtu apate fadhila za Mwenyezi Mungu.
4. Inaleta matumaini na faraja kwa waumini kwamba juhudi zao hazitapotea, na kwamba Mwenyezi Mungu hatowaacha wale wanaomwamini na kufanya wema.
5. Inathibitisha sifa ya Mwenyezi Mungu ya kuwa Mwaminifu kwa ahadi zake, jambo linaloimarisha imani ya mja kwa Mola wake na kumfanya amtumaini zaidi.