سوڕەتی سه‌با — ئایه‌ت 49

ووشەكان:

• الحق: ئیسلام و ئەو ڕێبازە ڕاستەی کە لە لایەن خوای گەورەوە هاتووە.
• الباطل: کوفرو هەڵە و ئەو شتانەی کە خەڵکی بەبێ بەڵگە پەیرەوی دەکەن.
• يبدئ ويعيد: دەستپێکردن و دووبارە کردنەوەی کارێک؛ واتە هیچ کار و دەسەڵاتێکی بۆ نەماوە.

تەفسیر:

ئەی پێغەمبەری خوا! بەو کافرانە بڵێ کە بەرەنگاری ڕاستی دەبنەوە: ڕاستی هات و ئیسلام بە هەموو ئەو ئەحکام و ڕێنماییانەی کە لەگەڵ خۆیدا هێناوە، جێگیر بوو. بەڵام بەتاڵ و کوفریش لەناو چوو و دەسەڵاتەکەی تێکشکا، بەشێوەیەک کە هیچ هێز و کاریگەرییەکی بۆ نەماوە؛ نە دەتوانێت شتێک دەستپێبکات و نە دەتوانێت شتێک دووبارە بکاتەوە. ئەمە مژدەیەکی گەورەیە بۆ موسڵمانان کە ڕاستی هەمیشە سەردەکەوێت و بەتاڵ لەناودەچێت، هەروەک خوای گەورە لە قورئاندا فەرموویەتی: ﴿بَلْ نَقْذِفُ بِالْحَقِّ عَلَى الْبَاطِلِ فَيَدْمَغُهُ فَإِذَا هُوَ زَاهِقٌ﴾ (ئەنبیا: ١٨). ئەی موسڵمان! دڵنیابە کە ڕاستی هەرگیز لەناوناچێت و بەتاڵ هەرچەند زۆریش بێت، کۆتاییەکەی لەناوچوونە. بۆیە پەیوەست بە ڕاستی بە و دڵخۆش بەو نەصرەتەی کە خوای گەورە بە موسڵمانانی بەخشیوە، و بزانە کە ئەم ئاینە بەهۆی ڕاستی و دادپەروەرییەوە بڵاودەبێتەوە، نەک بەهۆی زۆری ژمارە یان دەسەڵات.