سورت قیامت — آیت 36

د کلمو معنا:

• سُدًى: بې کاره، مهمل، پرېښودل شوی، چې نه امر ورته وشي او نه منع.

تفسیر:

آیا انسان دا ګمان کوي چې هغه به همداسې بې کاره او مهمل پرېښودل شي، چې نه به ورته امر وشي او نه به ورته منع وشي، نه به حساب ورڅخه واخیستل شي او نه به عذاب ورکړل شي؟ دا ډېره بې بنسټه خبره ده. انسان باید پوه شي چې هغه په دې نړۍ کې بې مقصده نه دی پیدا کړی شوی. الله تعالی هغه پیدا کړی، ورته عقل او پوهه ورکړې، او د هغه د ازموینې لپاره یې رسولان او کتابونه رالېږلي دي. نو انسان به خامخا حساب ورکوي، او د خپلو کړنو به سزا یا جزا ویني. ایا هغه څوک چې انسان یې له یوې کمزورې اوبو څخه پیدا کړی، بیا یې د وینې له ټوټې څخه جوړ کړی، او بېخي ښکلې بڼه یې ورکړې، ایا هغه د بیا ژوندي کولو توان نه لري؟ یقیناً هغه په دې ټولو توان لري.

فايدې:

• دا چې انسان په دې نړۍ کې بې مقصده نه دی پیدا کړی شوی، بلکې د هغه پیدایښت له یوه لوی حکمت سره تړلی دی.
• دا چې الله تعالی له انسان سره عدل کوي، او هېڅوک به بې حسابه نه پرېږدي.
• دا چې د آخرت په ورځ باور زموږ په ژوند کې د مسؤلیت احساس پیدا کوي او موږ له بدو کارونو منع کوي.
• دا چې د الله تعالی قدرت له هرڅه پورته دی، او هغه کولای شي چې انسان بیا ژوندی کړي، لکه څنګه چې یې لومړی ځل پیدا کړی و.