سورت انفال — آیت 20

د کلمو معناګانې:

• لَا تَوَلَّوْا عَنْهُ: له هغه (رسول) څخه مخ مه اړوئ، یعنې له اطاعت او پیروۍ څخه مه ګرځئ.
• وَأَنتُمْ تَسْمَعُونَ: په داسې حال کې چې تاسو (د قرآن آیتونه) اورئ.

تفسیر:

ای هغو کسانو چې پر الله او د هغه پر رسول یې ایمان راوړی دی! تاسو د الله او د هغه د رسول اطاعت وکړئ، یعنې د هغه په امرونو عمل وکړئ او له هغه څخه چې منع کړي یې دي، ځان وساتئ. او له خپل رسول (محمد صلی الله علیه وسلم) څخه مخ مه اړوئ او د هغه له اطاعت څخه مه وتښتئ، په داسې حال کې چې تاسو د قرآن هغه آیتونه اورئ چې پر تاسو لوستل کیږي، چې پکې د الله واضح دلیلونه او برهانونه شته دي. دا چې تاسو حق اورئ او پر تاسو حجت ثابتېږي، نو له اطاعت څخه تېښته او مخ اړول ستاسو لپاره هېڅ عذر نه لري.

فايدې:

• دا آیت مومنانو ته د الله او د هغه د رسول د اطاعت امر کوي، چې د ایمان بنسټ او د نجات لار ده.
• په دې پوهېږو چې یوازې اورېدل کافي نه دي، بلکې باید له اورېدو وروسته پرې عمل وشي؛ ځکه چې الله تعالی پر هغو کسانو نقد کوي چې حق اوري خو بیا هم له اطاعت څخه مخ اړوي.
• دا آیت مومنانو ته خبرداری ورکوي چې د رسول الله صلی الله علیه وسلم له لارښوونو څخه انحراف د الله له رحمت او برکته محرومېدو سبب ګرځي.
• په دې کې د قرآن د اورېدو اهمیت ښودل شوی، چې اورېدل د پند اخیستو او د عمل د سمون لومړی ګام دی.