சூரா அல்-அன்பால் — வசனம் 36

சொற்பொருள் விளக்கம்:

• يُنفِقُونَ: செலவு செய்கிறார்கள்.
• لِيَصُدُّوا: தடுப்பதற்காக.
• سَبِيلِ اللهِ: அல்லாஹ்வின் பாதை (இஸ்லாம்).
• حَسْرَةً: கவலை, வருத்தம், நட்டம்.
• يُغْلَبُونَ: தோற்கடிக்கப்படுவார்கள்.
• يُحْشَرُونَ: ஒன்று சேர்க்கப்படுவார்கள் (மறுமையில்).

விளக்கம்:

நிச்சயமாக, அல்லாஹ்வின் ஏகத்துவத்தை மறுத்து, அவனுடைய தூதருக்கு மாறு செய்த நிராகரிப்பாளர்கள், மக்களை அல்லாஹ்வின் பாதையிலிருந்து தடுப்பதற்காகவும், இறை நம்பிக்கையாளர்கள் அல்லாஹ்வின் மீதும் அவனுடைய தூதர் மீதும் நம்பிக்கை கொள்வதைத் தடுப்பதற்காகவும் தங்கள் செல்வங்களைச் செலவு செய்கிறார்கள். அவர்கள் இந்த நோக்கத்திற்காகத் தங்கள் செல்வங்களைச் செலவு செய்வார்கள். ஆனால், அவர்கள் விரும்பியது நிறைவேறாது. அல்லாஹ்வின் ஒளியை அணைக்கவும், அவனுடைய பாதையைத் தடுக்கவும் அவர்களால் முடியாது.

பின்னர், அவர்கள் செலவு செய்த அந்தச் செல்வம், அவர்களுக்குக் கவலைக்கும் வருத்தத்திற்கும் காரணமாகிவிடும். ஏனெனில், அவர்களுடைய செல்வங்கள் வீணாகப் போய்விடும், அவர்கள் எதிர்பார்த்த நோக்கம் நிறைவேறாமல் போய்விடும். இதனால் அவர்கள் மிகுந்த வருத்தத்திற்கு ஆளாவார்கள்.

பின்னர், அவர்கள் தோற்கடிக்கப்படுவார்கள். உலகில் இறை நம்பிக்கையாளர்களுக்கு எதிரான போரில் அவர்கள் தோல்வியடைவார்கள். பத்ருப் போரில் நடந்தது போன்று, இறுதியில் அவர்கள் தோல்வியடைவார்கள் என்பது உறுதி.

மேலும், நிராகரிப்பாளர்கள் மறுமை நாளில் நரகத்திற்கு ஒன்று சேர்க்கப்பட்டு, அதில் நுழைந்து என்றென்றும் வேதனை செய்யப்படுவார்கள். அவர்களில் சிலர் பின்னர் இஸ்லாத்தை ஏற்று மன்னிப்புப் பெற்றாலும், நிராகரிப்பில் நிலைத்திருப்பவர்கள் நரகத்திற்குச் செல்வார்கள்.

பயன்கள்:

1. அல்லாஹ்வின் பாதையைத் தடுக்க முயல்பவர்களின் முயற்சிகள் எவ்வளவு பெரியதாக இருந்தாலும், அவை தோல்வியில் முடியும் என்பதை இந்த வசனம் உணர்த்துகிறது. அல்லாஹ்வின் மார்க்கம் எப்போதும் வெற்றி பெறும்.
2. செல்வத்தை அல்லாஹ்வின் பாதையில் செலவு செய்வது நிலையான வெற்றியையும், அதற்கு மாற்றமாக தீய நோக்கங்களுக்காகச் செலவு செய்வது கவலைக்கும் வருத்தத்திற்கும் காரணமாகும் என்பதை இது காட்டுகிறது.
3. நிராகரிப்பாளர்கள் உலகில் தற்காலிகமாகச் செல்வத்தைப் பயன்படுத்தி தீமை செய்தாலும், மறுமையில் அவர்களின் முடிவு நரகம் என்பது உறுதியானது. இது நம்பிக்கையாளர்களுக்கு ஆறுதலையும், நிராகரிப்பாளர்களுக்கு எச்சரிக்கையையும் தருகிறது.
4. முஸ்லிம்கள் தங்கள் செல்வங்களை அல்லாஹ்வின் பாதையில் செலவு செய்ய வேண்டும் என்பதற்கான ஊக்கமளிக்கும் பாடமாக இது அமைகிறது. ஏனெனில், நல்ல நோக்கத்திற்காகச் செலவு செய்யப்படும் செல்வம் என்றென்றும் நிலைத்திருக்கும் நன்மையைத் தரும்.