Surah At-Tawbah — Aya 39

Ma'anar Kalmomi:

• تَنفِرُوا: Ku fita domin yaƙi da abokan gaba a cikin hanyar Allah.
• يَسْتَبْدِلْ: Ya musanya ku da waɗansu mutane.
• عَذَابًا أَلِيمًا: Azaba mai raɗaɗi.

Tafsirin Ayar:

Ya ku muminai! Idan ba ku fita domin yaƙin maƙiyanku a cikin hanyar Allah ba, Allah zai azabtar da ku da azaba mai raɗaɗi, wadda za ta ƙunshi wulakanci da ƙasƙanci a duniya da kuma azabar lahira. Kuma zai musanya ku da waɗansu mutane waɗanda suka fi ku alheri da ɗa'a, waɗanda idan aka kira su zuwa jihadi za su tashi da sauri su bi umurnin Allah da ManzonSa. Kuma ku san cewa rashin fitar ku ba zai cutar da Allah da kome ba, domin Allah wadatacce ne ba ya buƙatar ku, ku ne mabukata gare Shi. Idan kuka ƙi yin jihadi, to kuwa kawai kuna cutar da kanku ne, domin ku za ku rasa lada mai girma da kuma samun azaba. Kuma Allah Mai ikon yi ne a kan kowane abu, babu abin da zai gagara Shi. Shi ne Mai iya taimakon addininSa da ManzonSa ba tare da ku ba, domin ikonSa ba ya iyakance ga wani yanayi ba.

Fa'idodin Darasin:

1. Jihadi a cikin hanyar Allah abu ne mai matuƙar muhimmanci, wanda barinsa yana jawo azabar Allah a duniya da lahira.
2. Allah ba ya buƙatar taimakon kowa, domin Shi wadatacce ne; amma mu muke buƙatar ɗa'a da ibada gare Shi domin amfanin kanmu.
3. Idan mutane suka ƙi bin umurnin Allah, Allah zai iya musanya su da waɗansu mutanen da suka fi su ɗa'a da biyayya.
4. Ikon Allah babu iyaka, kuma Shi ne zai iya taimakon addininSa da ManzonSa ko da ba mu yi ba, don haka ya kamata mu yi gaggawar bin umurninSa kafin mu rasa damar da ake ba mu.