سوره رعد — آيت 7

1) لفظن جي معنيٰ ۽ وضاحت:

• لَوْلَا: ھئا، يعني اھڙو ڇو نه ٿيو.
• آيَةٌ: نشاني، معجزو، حجت ۽ دليل.
• مُنذِرٌ: ڊيڄاريندڙ، خبردار ڪرڻ وارو.
• هَادٍ: ھدايت ڪرڻ وارو، رستو ڏيکارڻ وارو.

2) آيت جي تفسير:

ڪافر ۽ منڪر ماڻھو ضد ۽ ھٺ جي ڪري چوڻ لڳا ته محمد ﷺ تي سندن رب کان ڪو اھڙو معجزو ڇو نه لاٿو ويو، جيئن موسىٰ عليہ السلام کي عصا ۽ عيسىٰ عليہ السلام کي مئلن کي زنده ڪرڻ جو معجزو ڏنو ويو ھو. حالانڪه معجزا لاھڻ يا نه لاھڻ جو اختيار رسول ﷺ جي ھٿ ۾ ناھي، بلڪه اھو الله تعالىٰ جي حڪمت ۽ مشيت جو معاملو آھي. پوءِ الله تعالىٰ پنھنجي نبي ﷺ کي تسلي ڏيندي فرمايو ته اوھان جو ڪم رڳو ماڻھن کي الله جي عذاب کان ڊيڄارڻ ۽ پيغام پھچائڻ آھي، معجزا آڻڻ اوھان جو ڪم ناھي. ۽ اھا حقيقت آھي ته ھر قوم لاءِ ڪو نه ڪو ھدايت ڪرڻ وارو نبي يا رسول ضرور رھيو آھي، جيڪو انھن کي سچو رستو ڏيکاريندو رھيو آھي.

3) آيت مان حاصل ٿيندڙ فائدا:

• الله تعالىٰ پنھنجي نبي ﷺ جي دل کي تسلي ڏني ته مخالفن جي مطالبن ۽ اعتراضن کي دل تي نه وٺو، ڇاڪاڻ ته اوھان جو فرض صرف تبليغ ۽ انذار آھي.
• ھر دور ۾ الله تعالىٰ پنھنجي مخلوق جي ھدايت لاءِ رھنما ۽ نبي موڪليندو رھيو آھي، اھا سندس رحمت ۽ حڪمت جو اظھار آھي.
• معجزا ۽ نشانيون الله جي ئي اختيار ۾ آھن، انسانن جي ضد ۽ ھٺ مطابق نه ٿيون لاٿيون وينديون آھن.
• نبي ﷺ جي ذات ۾ ھڪ عظيم سبق آھي ته داعي ۽ مبلغ کي گھڻي صبر، تحمل ۽ استقامت سان پنھنجو ڪم جاري رکڻ گھرجي.
• ايمان آڻڻ لاءِ معجزن جو انتظار ڪرڻ بدران قرآن مجيد جي ھدايت تي غور ڪرڻ گھرجي، ڇاڪاڻ ته قرآن پاڻ ھڪ عظيم ۽ ھميشه قائم رھڻ وارو معجزو آھي.