سورت نساء — آیت 116

د کلمو معناګانې:

• يُشْرَكَ بِهِ: له الله سره شرك كول، يعنې د الله په عبادت كې بل څوك شريكول.
• مَا دُونَ ذَٰلِكَ: له شرك پرته نور ټول ګناهونه.
• ضَلَالًا بَعِيدًا: له حق څخه ډېر لرې والى او بې لارې كېدل.

د آيت تفسير:

الله تعالى به هغه ګناه ونه بخښي چې له هغه سره شرك وكړى شي، ځكه چې دا د الله د الوهيت او عبادت په حق كې تر ټولو ستره تېرى ده. خو له شرك پرته نور ګناهونه، لكه ظلم، غيبت، دروغ او نور، د الله په مشيت پورې تړلي دي؛ كه هغه وغواړي، چا ته چې يې خوښه شي يې بخښي، او كه وغواړي، د خپل عدل له مخې يې سزا وركوي. بيا الله تعالى خبرداری وركوي چې څوك له الله سره شرك وكړي، هغه له حق څخه ډېر لرې ولاړ دى، ځكه چې هغه د خالق او مخلوق ترمنځ برابري كړې ده، او دا د هغه لپاره د نجات او برياليتوب هیله له منځه وړي.

فايدې:

• دا آيت د توحيد په اهميت ډېر ټينګار كوي او ښيي چې شرك تر ټولو ستر ګناه دى، چې الله يې نه بخښي.
• د الله رحمت او فضل ښيي، ځكه چې له شرك پرته نور ګناهونه د هغه په بخښنه كې راتلای شي، نو مومنان بايد د الله له رحمت نه ناهيلي نشي.
• دا آيت انسان ته د الله د عظمت او يووالي پېژندنه وركوي او هغه له شرك او بت پرستۍ څخه منع كوي، ترڅو د تلپاتې برياليتوب لار ومومي.