Sura Al-Ahqaf — Aya 19

Maana ya maneno:

• Darajat (درجات): Viwango na vyeo mbalimbali.
• Liyuwaffiyahum (ليوفيهم): Awakamilishie na awape kikamilifu.
• La yuzlamun (لا يظلمون): Hawatapunguziwa haki zao wala kuongezewa adhabu isiyo stahiki.

Ufafanuzi wa Aya:

Kila kikundi – cha watu wema na cha watu wabaya – kitapata vyeo na viwango vyake kwa mujibu wa matendo yaliyotendwa duniani. Wenye kheri watapata madaraja ya juu katika Pepo, na wenye shari watapata madaraja ya chini katika Moto. Hii ni kwa ajili ya Mwenyezi Mungu kuwalipa kikamilifu malipo ya matendo yao – wema kwa wema na ubaya kwa ubaya – bila kupunguziwa thawabu ya wema wao, wala kuongezewa adhabu ya ubaya wao. Hivyo, kila mtu atapata kile alichokistahili kwa haki kamili, bila dhulumu yoyote.

Faida zinazopatikana katika Aya hii:

1. Aya hii inathibitisha haki ya Mwenyezi Mungu na ukamilifu wa uadilifu Wake – hatadhulumu mtu yeyote, wala mwema wala mbaya.
2. Inatia moyo kufanya wema, kwa kuwa kila tendo jema litahesabiwa na kuthawabiwa kikamilifu, hata kama ni kidogo.
3. Inaonya dhidi ya maovu, kwa kuwa kila tendo baya litaadhibiwa kwa haki, bila kuongezewa wala kupunguzwa.
4. Inaonesha kwamba daraja za mtu kwa Mwenyezi Mungu zinategemea matendo yake – si kwa nasaba wala mali – hivyo kila mtu anaweza kujenga daraja zake kwa kuchagua matendo mema.
5. Inaleta faraja kwa waumini kwamba hakuna tendo jema litakalopotea, na hakuna dhuluma itakayotendeka Siku ya Kiyama – hivyo ni sababu ya kutumaini rehema na uadilifu wa Mwenyezi Mungu.