سورت انعام — آیت 162

د کلمو معناګانې:

• نُسُکي: زما قرباني (ذبح) — په حج او عمره کې د الله لپاره حيوان ذبح کول.
• مَحْيَايَ: زما ژوند.
• مَمَاتِي: زما مرګ.

تفسیر:

ای محترمه رسوله! ته دې مشرکانو ته ووایه: بېشکه زما لمونځ، زما قرباني (ذبح)، زما ژوند او زما مرګ — دا ټول یوازې د الله رب العالمین لپاره دي. زما لمونځ د هغه په نیت او د هغه په امر سره ادا کېږي، نه د بتانو او نه د نورو لپاره. زما قرباني هم یوازې د الله په نوم ذبح کېږي، نه د هغو بتانو په نوم چې تاسو يې ذبح کوئ، او نه د مړيو، پېريانو او نورو لپاره. زما ژوند په هغه څه کې تېرېږي چې الله يې خوښوي، او زما مرګ هم د هغه په لار کې دی. دا ټول د الله رب العالمین لپاره دي، او له هغه پرته بل هیڅوک په دې کې برخه نه لري. الله تعالی هغه ذات دی چې ما ته يې ژوند راکړی او هغه به ما ته مرګ هم راکوي.

فايدې:

دا آيت مونږ ته ښیي چې د مسلمان ټول ژوند بايد د الله لپاره وي — لمونځ، قرباني، ژوند او مرګ. کله چې مونږ خپل ټول کارونه د الله لپاره وکړو، نو زمونږ ژوند په عبادت بدلېږي او مونږ ته سکون او اطمینان حاصلېږي. دا آيت مونږ ته دا هم ښیي چې الله تعالی يوازې د عبادت وړ ذات دی، او له هغه پرته بل څوک د عبادت او قربانۍ حق نه لري. کله چې مونږ خپل ژوند او مرګ د الله لپاره وګرځوو، نو زمونږ ټول کارونه په ثواب بدلېږي، او دا د مومن لپاره تر ټولو لوړه مرتبه ده.