Surah Al-Anfal — Aya 39

Ma’anonin Kalmomi:

• Fitna: A nan ana nufin shirka (kafirci) da kuma hana mutane bin addinin Allah.
• Addinin duka: Wato dukan addinai da ayyukan ibada su zama na Allah Shi kaɗai, ba tare da wani abokin tarayya ba.

Tafsirin Ayar:

Ya ku muminai! Ku ci gaba da yaƙin kafirai har sai an kawar da shirka da duk wani abin da ke hana mutane bin addinin Allah, kuma har sai addini da ibada duka su zama na Allah kaɗai, ba tare da wani abin bautawa ba face Shi. Idan kuma sun daina kafircinsu da hana mutane bin addinin Allah, kuma suka shiga Musulunci, to ku bar su, ku daina yaƙinsu. Lalle ne Allah yana ganin dukan ayyukansu, babu wani abu da ya ɓoye a gare Shi, kuma zai saka musu daidai da abin da suka aikata.

Fa’idodin Ayar:

1. Yaƙi a Musulunci ba don son mulki ko dukiya ba ne, sai don kare addini da kuma tabbatar da ’yancin mutane su bauta wa Allah kaɗai.
2. Nisantar shirka da kuma kare addinin Allah abu ne mai matuƙar muhimmanci a Musulunci, har an umurce mu da mu yi yaƙi domin shi.
3. Idan abokan gaba sun daina kafircinsu suka tuba, to babu wani hujja a kan ci gaba da yaƙinsu; Musulunci addinin sulhu ne da rahama.
4. Ayar tana tunatar da mu cewa Allah yana lura da dukan ayyukanmu, don haka mu riƙa yin aikin alheri kawai, mu nisanta daga abin da ya hana.