Surja El-Mu'minun — Ajet 23

Kuptimet e fjalëve:

• A'budu Allah: Adhuronjeni vetëm Allahun, duke iu bindur Atij dhe duke e lartësuar.
• Min ilahin ghairuhu: Nuk ka zot tjetër që meriton adhurim përveç Tij.
• Afala tattaqun: A nuk i frikësoheni dënimit të Allahut dhe a nuk e ruani veten nga mosbindja ndaj Tij?

Tefsiri i Ajetit:

Allahu i Lartësuar tregon se Ai e dërgoi Profetin Nuh (paqja qoftë mbi të) te populli i tij, si të dërguarin e parë drejt njerëzve në tokë. Nuhu i ftoi ata me butësi dhe urtësi, duke u thënë: "O populli im, adhuronjeni vetëm Allahun, sepse ju nuk keni asnjë zot tjetër që meriton adhurim përveç Tij. Ai është Krijuesi juaj, Furnizuesi juaj dhe i Vetmi që i takon adhurimi. A nuk i frikësoheni Atij dhe dënimit të Tij, duke e lënë adhurimin e idhujve dhe duke iu kthyer Atij me pendim?" Me këtë thirrje, Nuhu i ftoi ata drejt monoteizmit të pastër (Teuhidit), duke ua kujtuar se Allahu është i Vetmi që meriton të adhurohet, dhe se frika nga Allahu është themeli i çdo të mire.

Përfitimet nga Ajeti:

1. Dërgimi i profetëve është mëshirë e madhe nga Allahu për njerëzimin, sepse ata i udhëzojnë njerëzit drejt rrugës së drejtë.
2. Thirrja drejt Teuhidit (monoteizmit) ishte mesazhi i parë dhe themelor i të gjithë profetëve, duke filluar nga Nuhu e deri te Muhamedi (paqja qoftë mbi ta).
3. Dashuria dhe butësia në thirrje janë nga metodat më të mira të profetëve, siç e shohim te fjala e Nuhut: "O populli im".
4. Frika nga Allahu (Takva) është çelësi i pranimit të besimit dhe shkak për shpëtim nga dënimi.
5. Ajeti na mëson se adhurimi i vetëm Allahut është qëllimi i krijimit dhe themeli i lumturisë në këtë botë dhe në botën tjetër.