Surah Az-Zumar — Aya 33

Ma’anonin Kalmomin:

“As-Sidƙi” na nufin gaskiya, wato magana da aiki nagari. “Waṣaddaqa bihi” na nufin ya yi imani da shi, ya kuma aikata abin da ya ƙunsa.

Tafsirin Ayar:

A cikin wannan ayar Allah yana nuna cewa wanda ya zo da gaskiya, wato Annabi Muhammad ﷺ, wanda ya zo da Kur’ani mai cike da gaskiya a cikin maganganunsa da ayyukansa, da kuma wadanda suka gaskata da shi, suka yi imani da shi, kuma suka yi aiki da abin da ya zo da shi, to waɗannan su ne masu taƙawa na gaskiya. Su ne waɗanda suka bi umurnin Ubangijinsu, kuma suka nisanci abin da ya hana su. A cikin wadannan mutane, na farko shi ne Annabi Muhammad ﷺ, sannan sahabbansa da suka yi imani da shi, da kuma duk wanda ya bi tafarkinsa har zuwa ranar kiyama. Waɗannan su ne waɗanda suka tattara dukkan halayen taƙawa, wato tsoron Allah da bin shari’arsa.

Fa’idodin Darasin:

1. Ƙarfafa imani da cewa gaskiya ita ce tushen tsira, kuma wanda ya zo da gaskiya ko ya gaskata da ita, to yana cikin masu taƙawa.
2. Nuna fifikon Annabi Muhammad ﷺ da sahabbansa, domin su ne suka fi dacewa da wannan siffa ta gaskiya da imani.
3. Ƙarfafa musulmi su riƙa yin magana da gaskiya da kuma aiki da ita, domin ita ce hanyar samun yardar Allah da aljanna.
4. Taƙawa ba kawai magana ba ce, amma aiki ne da imani, wanda ya haɗa da bin umurnin Allah da nisantar abin da ya hana.