Surah An-Nisa — Aya 83

Ma'anar Kalmomi:

• أَذَاعُوا بِهِ: Sun yada shi da bayyana shi ga jama'a.
• يَسْتَنبِطُونَهُ: Masu cire hukunci da fahimtar ma'anarsa daga tushensa.
• أُولِي الْأَمْرِ: Masu ilimi da fahimi da shawara daga cikin al'umma.

Tafsirin Ayar:

Idan wani labari ya zo wa waɗannan munafukai game da al'amarin tsaro da zaman lafiya da ke faranta wa musulmi rai, ko kuma game da tsoro da bala'i da ke baƙanta musu rai, sai su garzaya su yada shi a cikin jama'a ba tare da tabbatar da ingancinsa ba, suna neman ɓata wa musulmi rai da raunana zuciyarsu. Amma da sun mayar da wannan labari zuwa ga Manzon Allah (Sallallahu Alaihi Wasallama) da kuma zuwa ga masu ilimi da fahimi da shawara daga cikinsu, da waɗanda suke da basirar fahimtar al'amura sun gane mene ne ya kamata a bayyana daga cikinsa, kuma mene ne ya kamata a ɓoye. Kuma da ba don falalar Allah a kanku da rahamarsa ba, ya ku muminai, da kun bi shaidan da wasuwarsa, sai kaɗan daga cikinku waɗanda Allah ya kiyaye su.

Fa'idodin Darasin:

1. Nuna girman matsayin Manzon Allah (Sallallahu Alaihi Wasallama) da kuma masu ilimi, wajen mayar da al'amura zuwa gare su, domin su ne suka fi sanin abin da ya dace a yi.
2. Kada a yi gaggawar yada labarai masu muhimmanci da suka shafi tsaro da zaman lafiya na al'umma, sai an tabbatar da ingancinsu.
3. Ƙarfafa wa muminai cewa falalar Allah da rahamarsa su ne babban abin da ke kare su daga bin shaidan, don haka su riƙa godiya da yin shukri.
4. Hukuncin ɓoye sirrin al'umma da kuma hana yada abubuwan da za su iya cutar da musulmi, wani abu ne da addinin Musulunci ya karfafa.