Surah At-Taghabun — Aya 3

Ma’anar Kalmomi:

• Bil-Haqqi: Da hikima mai cikawa da gaskiya, ba wasa ba.
• Sawwarakum: Ya siffanta ku, ya ba ku surori.
• Fa Aḥsana Ṣuwarakum: Sai ya kyautata surorinku, ya mai da su mafi kyawon siffofi.
• Wa Ilayhil-Maṣīr: Zuwa gare Shi kawai komawo yake a Ranar ¡iyãma.

Tafsirin Ayar:

Allah Maɗaukaki ya halicci sammai da ƙasa da gaskiya da hikima mai zurfi, ba don wasa ko banza ba, amma domin nuna ikonsa da hikimarsa. Sa’an nan ya siffanta ku, ya ba ku surori, ya kyautata surorinku, ya mai da su mafi kyawon siffofi a cikin halittu, alhali kuwa da ya so, da ya mayar da su mummuna ko marasa kyau. Wannan kyauta ce daga gare Shi da falalarsa a kan ’yan Adam. Daga baya kuma, zuwa gare Shi kaɗai komawo yake a Ranar ¡iyãma, domin ya yi muku sakamako bisa ayyukanku: idan alheri ne, da alheri; idan sharri ne, da sharri.

Fa’idojin Ayar:

1. Tabbatar da cewa halittar sammai da ƙasa ba ta zama banza ba, tana nuna hikimar Allah da ikonsa, wanda ke sa mutum ya yi tunani a kan halittar.
2. Nuna falalar Allah a kan ’yan Adam, domin ya ba su kyawon surori da tsari mafi kyau, wanda ke sa mutum ya gode wa Allah da yabon sa.
3. Tunatar da mutum cewa komawo zuwa ga Allah ne, don haka ya kamata ya yi aikin alheri a duniya domin samun sakamako mai kyau a lahira.
4. Ayar tana ƙarfafa imani da cewa Allah Mai ikon komai ne, kuma tana sa mutum ya ƙara dogaro ga Allah da neman yardarsa.