سورت توبه — آیت 96

د کلمو معناګانې:

• يَحْلِفُونَ: دوى قسمونه خوري.
• لِتَرْضَوْا عَنْهُمْ: د دې لپاره چې تاسو پرې راضي شئ.
• الْفَاسِقِينَ: له اطاعت څخه وتونكي، د الله او د هغه د رسول له حكم نه سرغړونكي.

تفسير:

اى مومنانو! دا منافقان چې له جهاد څخه شاته پاتې شوي دي، تاسو ته قسمونه خوري چې بې له شكه دوى رښتيني دي او عذرونه يې سم دي، يواځې د دې لپاره چې تاسو پرې راضي شئ او د هغوى عذرونه ومنئ. خو اى مومنانو! تاسو له دوى نه مه راضي كېږئ، ځكه چې كه تاسو پرې راضي شئ، نو دا ستاسو رضا ده، خو الله تعالى بيا هم پر دوى نه راضي كېږي، ځكه چې دوى فاسقان دي، يعنې له الله او د هغه له رسول څخه وتونكي او د هغه له حكم نه سرغړونكي دي. نو كه تاسو پر دوى راضي شئ، نو دا رضا به دوى ته هېڅ ګټه ونه رسوي، ځكه چې دوى د الله په سخت غضب او عذاب كې دي. نو تاسو بايد له هغه چا نه راضي نه شئ چې الله پرې راضي نه دى.

فايدې:

• د مؤمنانو رضا د الله له رضا سره مشروط ده؛ يعنې كه الله پر چا راضي نه وي، نو د مؤمنانو رضا هېڅ ارزښت نه لري.
• منافقان د خپلو باطلو عذرونو د پټولو لپاره قسمونه خوري، خو الله تعالى د هغوى حقيقت ښكاره كړى دى.
• مسلمان بايد د الله له حكم سره سم عمل وكړي، نه د خپلې خوښې او زړه له مخې، او له هغه چا سره مينه او رضا بايد ونلري چې الله پرې ناراضه وي.
• په دې آيت كې د منافقانو د سخت عذاب او د الله له رحمت څخه د محروميت خبره ده، چې بايد مسلمانان ورڅخه عبرت واخلي او د نفاق له هر ډول څخه ځان وساتي.