സൂറ യൂനുസ് — ആയത്ത് 57

ഹേ മനുഷ്യരേ, നിങ്ങളുടെ രക്ഷിതാവിങ്കൽ നിന്ന് നിങ്ങൾക്ക് ഒരു ഉപദേശവും ഹൃദയങ്ങളിലുള്ളതിന് രോഗശാന്തിയും സത്യമാർഗ്ഗത്തിലേക്കുള്ള വഴികാട്ടിയും സത്യവിശ്വാസികൾക്ക് അനുഗ്രഹവും വന്നെത്തിയിരിക്കുന്നു.

പദവിവരണം:

• മൗഇള (موعظة): ഉപദേശം, ഓർമ്മപ്പെടുത്തൽ
• ശിഫാഅ് (شفاء): രോഗശാന്തി, ചികിത്സ
• സ്വുദൂർ (صدور): ഹൃദയങ്ങൾ (സ്വദ്്റ് എന്നതിന്റെ ബഹുവചനം)
• ഹുദാ (هدى): മാർഗ്ഗദർശനം, നേർവഴി കാണിക്കൽ
• റഹ്മ (رحمة): കാരുണ്യം, അനുഗ്രഹം

വ്യാഖ്യാനം:

അല്ലാഹു തആല തന്റെ സൃഷ്ടികളോട് അഭിസംബോധന ചെയ്തുകൊണ്ട് പറയുന്നു: മനുഷ്യരേ, നിങ്ങളുടെ രക്ഷിതാവിൽ നിന്ന് നിങ്ങൾക്ക് വന്നെത്തിയിരിക്കുന്നു ഖുർആൻ എന്ന മഹത്തായ ഗ്രന്ഥം. അതിൽ നിങ്ങൾക്ക് വേണ്ടിയുള്ള ഉപദേശങ്ങളും ഓർമ്മപ്പെടുത്തലുകളും അടങ്ങിയിരിക്കുന്നു. അല്ലാഹുവിന്റെ ശിക്ഷയെക്കുറിച്ച് ഭയപ്പെടുത്തുന്നതും അവന്റെ വാഗ്ദാനങ്ങളെക്കുറിച്ച് ആശ്വസിപ്പിക്കുന്നതുമായ വചനങ്ങളാണ് അതിലുള്ളത്. നിങ്ങളുടെ സ്വഭാവങ്ങളെയും പ്രവർത്തനങ്ങളെയും പരിഷ്കരിക്കുന്നതിനുള്ള മാർഗ്ഗദർശനങ്ങൾ അതിൽ അടങ്ങിയിരിക്കുന്നു.

ഈ വേദഗ്രന്ഥം നിങ്ങളുടെ ഹൃദയങ്ങളിലുള്ള രോഗങ്ങൾക്കുള്ള ചികിത്സയാണ്. അജ്ഞത, അവിശ്വാസം, സംശയം, ദുർവിചാരങ്ങൾ, അസൂയ, പക തുടങ്ങിയ മാനസിക രോഗങ്ങളെ അത് ശുദ്ധീകരിക്കുന്നു. ഖുർആൻ പഠിക്കുകയും അതനുസരിച്ച് പ്രവർത്തിക്കുകയും ചെയ്യുന്നവരുടെ ഹൃദയങ്ങൾക്ക് അത് ശാന്തിയും സമാധാനവും നൽകുന്നു.

കൂടാതെ, അത് സത്യമാർഗ്ഗത്തിലേക്കുള്ള വഴികാട്ടിയാണ്. വഴിതെറ്റിയവരെ നേർവഴിയിലേക്ക് നയിക്കുന്ന പ്രകാശമാണ്. അത് പിന്തുടരുന്നവരെ നാശത്തിൽ നിന്ന് രക്ഷിച്ച് വിജയത്തിലേക്ക് എത്തിക്കുന്നു.

എന്നാൽ ഈ അനുഗ്രഹം പൂർണ്ണമായി ലഭിക്കുന്നത് സത്യവിശ്വാസികൾക്കാണ്. അവർ മാത്രമാണ് ഇതിന്റെ പ്രയോജനം നേടുന്നത്. കാരണം അവർ വിശ്വസിക്കുകയും അതനുസരിച്ച് പ്രവർത്തിക്കുകയും ചെയ്യുന്നു. അതിനാൽ അത് അവർക്ക് കാരുണ്യവും അനുഗ്രഹവുമായി മാറുന്നു. എന്നാൽ അവിശ്വാസികളെ സംബന്ധിച്ചിടത്തോളം അത് അവർക്ക് വഴികേടും അന്ധതയുമായി മാറുന്നു.

പ്രിയ സഹോദരങ്ങളേ, ഈ വിശുദ്ധ ഗ്രന്ഥം അല്ലാഹു നമുക്ക് നൽകിയ ഏറ്റവും വലിയ അനുഗ്രഹമാണ്. അതിനെ സ്വീകരിക്കുകയും അതനുസരിച്ച് ജീവിക്കുകയും ചെയ്യുന്നവർക്ക് ഇഹലോകത്തും പരലോകത്തും വിജയമുണ്ട്. നമുക്ക് ഈ ദിവ്യഗ്രന്ഥത്തെ നമ്മുടെ ജീവിതത്തിന്റെ വഴികാട്ടിയാക്കാം. അതിലെ ഉപദേശങ്ങൾ സ്വീകരിച്ച് നമ്മുടെ ഹൃദയങ്ങളെ ശുദ്ധീകരിക്കാം. അല്ലാഹുവിന്റെ കാരുണ്യവും അനുഗ്രഹവും നമുക്ക് ലഭ്യമാകട്ടെ. ആമീൻ.