Surah Al-Mulk — Aya 1

Ma’anar Kalmomi:

• تَبَارَكَ: Ya girma da ɗaukaka, kuma ya yawaita alherinsa da falalarsa.
• بِيَدِهِ الْمُلْكُ: Mulkin duniya da lahira duka a hannunsa ne, shi kaɗai ke da iko da sarauta.
• قَدِيرٌ: Mai ikon yin dukan abu, babu abin da ya buwaye shi.

Tafsirin Ayar:

Allah ya girma da ɗaukaka, kuma alherinsa ya yawaita a kan dukan halittunsa. Shi ne wanda mulkin dukan abu yake a hannunsa, na duniya da lahira, kuma hukuncinsa da umarninsa suna aiki a cikinsu babu wani abin da ke fita daga ikonsa. Shi ne Mai iko a kan kowane abu, babu abin da ya gagara shi, duka abubuwa suna ƙarƙashin ikonsa da kuzarinsa. Wannan ayar tana tabbatar da cewa Allah yana da hannu, amma hannun da ya dace da girmansa da ɗaukakarsa, ba kamar hannun halittu ba.

Faidodin da ake samu daga wannan ayar:

1. Tabbatar da cewa dukan mulki da sarauta na Allah ne kaɗai, wanda hakan yake sa mu dogara gare shi a cikin dukan al’amuranmu.
2. Ƙarfafa imani da cewa Allah yana da ikon yin dukan abu, don haka babu abin da ya kamata mu ji tsoro face shi, kuma babu abin da ya kamata mu fata face daga gare shi.
3. Nuna girman alherin Allah da falalarsa a kan halittunsa, wanda yake sa mu ƙara godiya gare shi da yawaita bauta masa.
4. Tunatar da mu cewa duk abin da muke da shi na mulki ko iko a duniya, wani ɗan ƙaramin abu ne daga ikon Allah, don haka kada mu yi girman kai da shi, mu kuma yi amfani da shi a cikin abin da yake so da yardarsa.