سورت اعراف — آیت 56

د کلمو معناګانې:

• تُفْسِدُوا: فساد کول، خرابول.
• إِصْلَاحِهَا: د هغې (ځمکې) اصلاح، چې الله تعالی کړې ده.
• خَوْفًا: د الله له عذابه وېره.
• طَمَعًا: د الله د رحمت او ثواب هيله.
• الْمُحْسِنِينَ: نېكي كوونكي، هغه كسان چې په ښو كارونو او عبادتونو كې ښه والی كوي.

تفسیر:

الله تعالی په دې آیت كې خپلو بندګانو ته امر كوي چې په ځمكه كې فساد مه كوئ، یعنې د ظلم، شرك، غلا، رشوت، جګړې او نورو بدو كارونو له لارې ځمكه مه خرابوئ، په داسې حال كې چې الله تعالی ځمكه د پیغمبرانو په رالېږلو او د دین د احكامو په وضع كولو سره اصلاح كړې ده. نو بندګان باید د دې اصلاح ساتنه وكړي او د فساد له لارې يې خرابه نه كړي.

بیا الله تعالی فرمايي: تاسو الله ته په داسې حال كې دعا وكړئ چې ستاسو زړونه د هغه له عذابه وېرېدلي وي او د هغه د رحمت او ثواب هيله ولرئ، یعنې دعا دې دواړو حالتونو سره وي، نه دا چې يواځې وېره وي او نه دا چې يواځې هيله وي.

په پای كې الله تعالی فرمايي: بېشكه د الله رحمت نېكي كوونكو ته ډېر نژدې دی. دا د هغو كسانو لپاره زېری دی چې په خپلو عبادتونو، معاملاتو او اخلاقو كې نېكي كوي، چې د الله رحمت به يې حتماً ترلاسه كړي.

فايدې:

1. دا آیت مونږ ته ښيي چې اسلام د فساد او خرابۍ مخالف دی او په هر ډول فساد باندې بندیز لګوي، كه هغه په ځمكه كې وي او كه په ټولنه كې.
2. مونږ ته دا درس راكوي چې دعا باید د وېرې او هيلې په منځ كې وي، نه دا چې يواځې له الله څخه ووېرېږو او نه دا چې يواځې پر رحمت يې تكيه وكړو.
3. دا آیت مونږ ته د نېكي كوونكو كسانو لپاره زېری وركوي چې د الله رحمت دوی ته نژدې دی، نو كه چېرې غواړو چې د الله رحمت ترلاسه كړو، نو باید په خپلو ټولو چارو كې نېكي وكړو.
4. دا آیت مونږ ته دا هم ښيي چې د ځمكې اصلاح د الله له لوري ده، نو مونږ باید د دې اصلاح ساتنه وكړو او د خپلو ګناهونو په وجه يې خرابه نه كړو.