சூரா மர்யம் — வசனம் 45

சொற்பொருள் விளக்கம்:

• يَمَسَّكَ – உன்னைத் தொடும் / உன்னை அடையும்.
• عَذَابٌ – வேதனை / தண்டனை.
• وَلِيًّا – தோழன் / நெருங்கிய நண்பன் (இங்கு நரகில் ஷைத்தானுடன் இணைந்த தோழன் என்பது பொருள்).

விளக்கம்:

இறைநேசர் இப்றாஹீம் (அலைஹிஸ்ஸலாம்) தம் தந்தையிடம் மிகவும் பணிவாகவும் அன்பாகவும் கூறுகிறார்: "என் அன்புத் தந்தையே! நீர் இறைமறுப்பில் நிலைத்திருந்து இறந்துவிட்டால், அளவற்ற அருளாளனாகிய அல்லாஹ்விடமிருந்து உம்மை ஒரு கொடிய வேதனை தொடுமோ என்று நான் அஞ்சுகிறேன். அவ்வாறு நீர் வேதனைக்குள்ளானால், நரகில் ஷைத்தானுக்கு நெருங்கிய தோழனாகவும் அவனுடைய வழியைப் பின்பற்றியவனாகவும் ஆகிவிடுவீர். ஏனெனில், உமது இறைமறுப்பும் சிலைவழிபாடும் ஷைத்தானுக்கு வழிப்பட்டதாகும். அந்த நிலையில் நீர் அவனுடன் சேர்ந்து நரகில் நிரந்தரமாகத் துன்புறுவீர்."

பயன்கள்:

1. பெற்றோரிடம் அன்பாகவும் மரியாதையுடனும் பேச வேண்டும்; அவர்கள் தவறான பாதையில் இருந்தாலும் கடுமையாக நடந்துகொள்ளக் கூடாது. இப்றாஹீம் (அலை) அவர்கள் தம் தந்தையிடம் "யா அபத்" (என் அன்புத் தந்தையே) என்று மிக இனிமையாக அழைத்ததே இதற்குச் சான்று.
2. மறுமை வேதனையின் தீவிரத்தை நினைவூட்டுவது மக்களை நல்ல பாதைக்கு அழைப்பதற்கான சிறந்த வழியாகும்.
3. ஷைத்தானுடன் நெருக்கம் கொள்வது மனிதனுக்கு மிகப்பெரிய இழப்பாகும்; அவனைப் பின்பற்றுவோர் மறுமையில் அவனுடன் சேர்ந்து நரகில் இருப்பார்கள்.
4. உண்மையான அன்பு என்பது அன்புக்குரியவரின் உலக மேன்மையை மட்டும் விரும்பாமல், அவரது மறுமை வெற்றிக்காகவும் கவலைப்படுவதாகும்.
5. இஸ்லாம் குடும்ப உறவுகளைப் பேணுமாறும், நல்லுபதேசத்தை அழகிய முறையில் செய்யுமாறும் போதிக்கிறது.