സൂറ അൽ-ഹജ്ജ് — ആയത്ത് 43

വചനാർത്ഥങ്ങൾ:

• وَقَوْمُ إِبْرَاهِيمَ: ഇബ്രാഹീം നബിയുടെ സമുദായം (അദ്ദേഹത്തെ നിഷേധിച്ചവർ).
• وَقَوْمُ لُوطٍ: ലൂത്ത് നബിയുടെ സമുദായം (അദ്ദേഹത്തെ നിഷേധിച്ചവർ).

വ്യാഖ്യാനം:

പ്രവാചകരേ, നിങ്ങളുടെ ജനത നിങ്ങളെ നിഷേധിക്കുന്നുവെങ്കിൽ അതിൽ അത്ഭുതപ്പെടേണ്ടതില്ല. കാരണം നിങ്ങൾക്ക് മുമ്പുള്ള പ്രവാചകന്മാരെയും അവരുടെ സമുദായങ്ങൾ നിഷേധിച്ചിട്ടുണ്ട്. നൂഹ് നബിയുടെ ജനത, ആദ് സമുദായം, ഥമൂദ് സമുദായം, ഇബ്രാഹീം നബിയുടെ ജനത, ലൂത്ത് നബിയുടെ ജനത, ശുഐബ് നബിയെ നിഷേധിച്ച മദ്യൻകാർ, മൂസാ നബിയെ നിഷേധിച്ച ഫിർഔനും അവന്റെ ജനതയും എന്നിവരെല്ലാം അവരവരുടെ പ്രവാചകന്മാരെ നിഷേധിച്ചവരാണ്. ഇവരിൽ ആർക്കും ഞാൻ ഉടനടി ശിക്ഷ നൽകിയില്ല; മറിച്ച് അവർക്ക് അവസരം നൽകി. എന്നിട്ട് അവരെയെല്ലാം ഞാൻ ശിക്ഷയിലൂടെ പിടികൂടി. അവരുടെ നിഷേധത്തിനും സത്യനിഷേധത്തിനുമുള്ള എന്റെ പ്രതികരണം എത്ര കഠിനമായിരുന്നു! അവർ അനുഭവിച്ചിരുന്ന അനുഗ്രഹങ്ങളെ ഞാൻ ശിക്ഷയും നാശവുമായി മാറ്റി.

പാഠങ്ങൾ:

• പ്രവാചകന്മാരെ നിഷേധിക്കുന്നത് പുതിയ കാര്യമല്ല; ചരിത്രത്തിലുടനീളം ഇത് ആവർത്തിക്കപ്പെട്ടിട്ടുണ്ട്. അതിനാൽ സത്യവിശ്വാസികൾ നിഷേധം കണ്ട് തളരരുത്.
• അല്ലാഹു അവന്റെ ശിക്ഷയിൽ തിടുക്കം കാണിക്കുന്നില്ല; അവൻ മനുഷ്യർക്ക് മാർഗദർശനം സ്വീകരിക്കാൻ അവസരം നൽകുന്നു. എന്നാൽ അവസരം അവസാനിച്ചാൽ ശിക്ഷ അനിവാര്യമാണ്.
• അല്ലാഹുവിന്റെ ശിക്ഷ വരുമ്പോൾ അത് അത്യന്തം കഠിനവും നിർണായകവുമായിരിക്കും; അത് അനുഗ്രഹങ്ങളെ നാശമാക്കി മാറ്റും.
• ഈ ചരിത്ര സംഭവങ്ങൾ മനുഷ്യർക്ക് പാഠമാണ്; അവരിൽ നിന്ന് പഠിച്ച് സത്യത്തെ സ്വീകരിക്കാൻ തയ്യാറാകണം.