سورت مائده — آیت 22

د مهمو کلمو معنا:

• جَبَّارِينَ: هغه ډېر زورور او قوي کسان چې خلک په زور خپل تابع کوي، او ډېر ظالم وي.

تفسیر:

کله چې حضرت موسیٰ علیه السلام خپل قوم بني اسرائيل ته د جهاد او د بيت المقدس د ننوتلو امر وکړ، نو دوی په ځواب کې وويل: "اى موسىٰ! په دې ځمکه کې ډېر زورور او قوي کسان اوسي، چې موږ ورسره د جنګ وس نه لرو. موږ به هغه وخته دې ځمکې ته نه ننوځو تر څو چې دوی له هغې نه وځي. که دوى له دې ځايه ووځي، نو بيا به موږ په کې ننوځو."

دا خبره د بني اسرائيلو د کمزورۍ، بزدلۍ او د الله تعالىٰ پر ژمنه د بې باورۍ ښکارندويي کوله، ځكه چې الله تعالىٰ دوى ته دا ځمكه ژمنه كړې وه، خو دوى د الله پر امر عمل ته چمتو نه وو.

فايدې:

1. مومن بايد تل پر الله تعالىٰ باور ولري او پوه شي چې بريا د الله په مرسته ده، نه د دښمن په شمېر او زور.
2. له دښمن نه وېره او بزدلي د مومن له صفاتو نه نه ده؛ مومن بايد زړور او پر الله توکل کوونکی وي.
3. کله چې الله تعالىٰ يو کار امر کړي، نو بايد پرته له ځنډه يې عملي کړو، ځکه چې په امر كې د الله حكمت او خير وي.