සූරා හූද් — ආයාත් 120

වදන්හි අර්ථ:

• නකුස්සු – අපි විස්තර කරමු / පවසමු
• නුසබ්බිතු – අපි ශක්තිමත් කරමු / තහවුරු කරමු
• ෆුආද – හදවත
• මව්ඉසා – උපදෙස / අවවාදය
• ධික්රා – මතක් කිරීම / පාඩමක්

අර්ථ විවරණය:

අල්ලාහ් තආලා තම නබිවරයාණන් (සල්ලල්ලාහු අලයිහි වසල්ලම්) අමතමින් පවසන්නේ, පෙර සිටි රසූල්වරුන්ගේ පුවත් අතුරින් අපි ඔබට විස්තර කර දෙන සෑම පුවතක්ම, ඔබගේ හදවත ශක්තිමත් කිරීමට සහ ධෛර්යවත් කිරීමටය. මන්ද, රසූල්වරුන්ට මුහුණ දීමට සිදු වූ දුෂ්කරතා සහ ඔවුන් ඉවසීමෙන් කටයුතු කළ ආකාරය දැන ගැනීමෙන්, නබිතුමාණන්ගේ (සල්ලල්ලාහු අලයිහි වසල්ලම්) සිත සනසනු ලැබේ. එමෙන්ම ඔහුගේ නියත විශ්වාසය තවදුරටත් වර්ධනය වේ.

මෙම හූද් සූරාව තුළින් ඔබ වෙත පැමිණ ඇත්තේ පරම සත්යයයි. එනම්, නබිවරුන්ගේ සත්ය බව සහ ඔවුන් ගෙන ආ දූත මෙහෙවරේ සත්ය බව පැහැදිලි කරන සත්ය පුවත්ය. එමෙන්ම මෙම සූරාව ප්රතික්ෂේප කරන්නන්ට උපදෙසක් වශයෙන් ද, අල්ලාහ් සහ ඔහුගේ රසූල්වරුන්ව විශ්වාස කරන දැහැමියන්ට මතක් කිරීමක් සහ පාඩමක් වශයෙන් ද පැමිණ ඇත. එමගින් ඔවුන් පෙර ජාතීන්ට සිදු වූ දඬුවම් ගැන සිතා බලා, අල්ලාහ්ට බිය වී යහමඟට පැමිණෙති.

උපදේශ සහ පාඩම්:

1. අල්ලාහ් තම නබිවරුන්ගේ ඉතිහාස කතා කුර්ආනයේ විස්තර කර ඇත්තේ අපගේ ජීවිත සඳහා මඟ පෙන්වීමක් සහ ශක්තියක් ලබා දීමටය. එබැවින් අපද ඒවා කියවා පාඩම් ඉගෙන ගත යුතුය.
2. දුෂ්කරතා හමුවේ ඉවසීම සහ ස්ථීරභාවය නබිවරුන්ගේ ශ්රේෂ්ඨ ගුණාංගයකි. ඔවුන්ගේ ජීවිත කතා අපට ඉවසීමේ ශක්තිය ලබා දෙයි.
3. කුර්ආනයේ ඇති ඉතිහාස කතා හුදු විනෝද කතා නොව, සත්යය තහවුරු කිරීමට, හදවත් සනසාලීමට සහ මනුෂ්යයාව යහමඟට ගෙන ඒමට ඇති දිව්යමය මඟ පෙන්වීම්ය.
4. පෙර ජාතීන්ට සිදු වූ දඬුවම් ගැන සිතා බැලීම මනුෂ්යයාට අල්ලාහ්ගේ දඬුවමට බිය වී, ඔහුගේ අණපනත් පිළිපැදීමට උපකාරී වේ.
5. කුර්ආනයේ සෑම පුවතක්ම ඇත්තේ අපගේ ඇදහිල්ල ශක්තිමත් කිරීමට සහ අපගේ ජීවිත නිවැරදි කර ගැනීමටය. එබැවින් අප එය අවබෝධයෙන් කියවා ක්රියා කළ යුතුය.