சூரா இப்ராஹீம் — வசனம் 44

சொற்பொருள் விளக்கம்:

• அன்திர்: எச்சரிக்கை செய்வீராக.
• அத்தாப்: வேதனை (இங்கு மறுமை நாளின் வேதனை).
• அஜல் கரீப்: நெருங்கிய தவணை (இங்கு உலக வாழ்க்கைக்குத் திரும்புதல்).
• நுஜிப்: பதிலளிப்போம் (உமது அழைப்பை ஏற்போம்).
• அக்ஸம்தும்: சத்தியம் செய்தீர்கள்.
• ஸவால்: மாற்றம், நீக்கம், அகற்றப்படுதல்.

விளக்கம்:

நபியே! நீர் மக்களுக்கு அந்த நாளைப் பற்றி எச்சரிக்கை செய்வீராக – அநியாயக்காரர்கள் (இறைவனுக்கு இணை வைத்து தமக்குத் தாமே தீங்கு செய்தவர்கள்) வேதனையைக் காணும் நாளில், அவர்கள் கூறுவார்கள்: "எங்கள் இறைவனே! எங்களுக்கு ஒரு சிறிது அவகாசம் வழங்குவாயாக! எங்களை உலகிற்குத் திருப்பியனுப்புவாயாக! நாங்கள் உனது அழைப்பிற்கு பதிலளித்து உன்னை ஒருவனாக ஏற்று, உனது தூதர்களைப் பின்பற்றுவோம்."

அப்போது அவர்களுக்கு நிந்தனையாக பதில் கூறப்படும்: "நீங்கள் இதற்கு முன் உலக வாழ்க்கையில், 'எங்களுக்கு மரணமோ மாற்றமோ இல்லை; நாங்கள் இங்கேயே நிலைத்திருப்போம்' என்று சத்தியம் செய்து, மறுமையின் நிகழ்வை நம்ப மறுத்தீர்களே! அது உங்களுக்கு நினைவில்லையா?"

பயன்கள்:

1. இறைவனின் வேதனை நிச்சயம் வரவிருப்பது; அது வரும் முன் மனந்திரும்பி நல்லறங்கள் செய்ய வேண்டும் என்பதை இது நினைவூட்டுகிறது.
2. உலக வாழ்க்கை நிலையானது அல்ல; மரணத்திற்குப் பின் மறுமை வாழ்க்கை உண்டு என்பதை உறுதியாக நம்ப வேண்டும்.
3. மறுமையில் கோரிக்கை வைக்கும் நேரம் அல்ல; இப்போதே இறைவனின் அழைப்பிற்கு பதிலளித்து, அவனது தூதர்களைப் பின்பற்ற வேண்டும்.
4. இறைவனின் கருணை மகத்தானது; அவன் மனந்திரும்புபவர்களை ஏற்றுக்கொள்கிறான். ஆனால் மரணத்திற்குப் பின் மனந்திரும்புதலுக்கு வாய்ப்பில்லை என்பதையும் இது எடுத்துக்காட்டுகிறது.
5. இறைவனின் எச்சரிக்கைகளை இலகுவாக எடுத்துக்கொள்ளக் கூடாது; அவனுடைய வாக்குறுதிகள் உண்மையானவை என்பதில் ஐயமில்லை.