Sura Al-Ma'ida — Aya 71

Maana za Maneno:

• FITNAH: Hapa ina maana ya adhabu au mateso.
• WAKAWA VIPOFU (Fa'amu): Walipotea na hawakuona haki.
• WAKAWA VIZIWI (Shommu): Hawakusikia haki kwa masikio ya kukubali.
• TAABATU ALLAHU ALAIHIM: Mwenyezi Mungu alikubali toba yao na kuwarehemu.

Tafsiri ya Aya:

Watu hawa waliovunja ahadi na kuwaua manabii walidhani kwamba Mwenyezi Mungu hatawaadhibu kwa makosa yao na ukaidi wao. Walidhani kuwa hakuna adhabu itakayowafika, kwa hiyo wakaendelea na tamaa zao na uasi wao. Wakawa vipofu wasioona haki, na wakawa viziwi wasiosikia ukweli kwa masikio ya kukubali na kufuata. Hapo Mwenyezi Mungu aliwashukia kwa adhabu yake, na waliposikitika na kutubu, Mwenyezi Mungu alikubali toba yao kwa fadhila yake na rehema yake. Lakini baada ya hapo, wengi miongoni mwao walirudi tena kwenye upofu na uziwi, wasiokubali haki hata baada ya kuwafikia dalili zilizo wazi. Mwenyezi Mungu anayaona matendo yao yote, mema na mabaya, wala hakuna chochote kinachofichika kwake, na atawalipa kwa kadiri ya matendo yao.

Faida Zinazotokana na Aya:

1. Onyo kuhusu kudharau adhabu ya Mwenyezi Mungu: Muislamu anapaswa kuogopa adhabu ya Mwenyezi Mungu na asijidanganye kwa kufanya maovu akidhani kwamba hataadhibiwa. Mwenyezi Mungu ni Mwenye kusikia na kuona kila jambo.
2. Upofu na uziwi wa kiroho ni adhabu kubwa: Mtu anapoendelea kufanya maovu, moyo wake unakuwa mgumu na hawezi kuona haki wala kuisikia. Hii ni adhabu ya Mwenyezi Mungu kwa wale wanaoendelea kwenye uasi.
3. Toba inafungua mlango wa rehema: Mwenyezi Mungu ni Mwingi wa rehema na hukubali toba ya waja wake wakati wowote, hata kama wamefanya makosa makubwa. Hii inampa matumaini kila mwenye dhambi kurejea kwa Mwenyezi Mungu.
4. Kurudia dhambi baada ya toba ni hatari: Aya inaonyesha kwamba baadhi ya watu walitubu kisha wakarudi kwenye upofu wao. Hii inafundisha kwamba mtu anapaswa kusimama imara kwenye njia ya haki na asirudie maovu.
5. Uangalizi wa Mwenyeze Mungu: Mwenyezi Mungu anayaona matendo yetu yote, hakuna linalofichika kwake. Hii inamfanya muumini kuwa makini katika matendo yake, akijua kwamba atakabiliwa na Mwenyezi Mungu na kuhesabiwa.