Surah Al-Mujadilah — Aya 19

Ma'anar Kalmomi:

• اسْتَحْوَذَ عَلَيْهِمُ الشَّيْطَانُ: Shaiɗan ya rinjaye su kuma ya mallake su gaba ɗaya.
• فَأَنسَاهُمْ ذِكْرَ اللَّهِ: Ya sa su manta da tunawa da Allah da yin abin da Yake so.
• حِزْبُ الشَّيْطَانِ: Ƙungiyar Shaiɗan da mabiyansa.
• الْخَاسِرُونَ: Waɗanda suka yi hasarar kansu a duniya da Lahira.

Tafsiri:

Shaiɗan ya rinjayi waɗannan mutane kuma ya mallake su ta hanyar bin umarninsa da barin abin da Allah ya umarta, har ya sa su manta da tunawa da Allah da aikata abin da Yake yarda da shi. Waɗannan su ne ƙungiyar Shaiɗan da mabiyansa. Lalle ne, ƙungiyar Shaiɗan su ne masu hasara a duniya da Lahira, domin sun sayar da shiriya da ɓata, kuma sun mayar da Aljanna da wuta. Sun ɓatar da rayuwarsu ta har abada saboda bin son zuciya da shaidan.

Fa'idodi:

1. Imani da cewa Shaiɗan ba shi da iko a kan mutum sai ta hanyar son rai da bin abin da yake so; don haka wanda ya bi Allah, Shaiɗan ba zai iya mallake shi ba.
2. Tunawa da Allah (zikir) shine mabuɗin tsira daga shaidan, kuma mantawa da shi shine hanyar shaidan zuwa ga ɓata mutum.
3. A tattare da waɗanda suka bi Shaiɗan akwai hasara babba a duniya da Lahira, kuma babu wani abin alfahari a cikin zama ƙungiyarsa.
4. Wannan ya ƙarfafa mu mu kasance cikin ƙungiyar Allah ta hanyar yin imani da ayyukan ƙwarai, domin mu sami nasara a duniya da Lahira.