ሱረቱ አል-አዕራፍ — አንቀጽ 43

የቃላት ማብራሪያ፦

• وَنَزَعْنَا፦ አወጣን፣ አስወገድን።
• غِلّ፦ በልብ ውስጥ የሚሰወር ጥላቻ፣ ቂምና ቅናት።
• تَجْرِي مِن تَحْتِهِمُ الْأَنْهَارُ፦ ከእግሮቻቸው ሥር ወንዞች ይፈሳሉ።
• هَدَانَا፦ መራን፣ ለቅን መንገድ አቀናን።
• أُورِثْتُمُوهَا፦ ውርስ አድርገን ሰጠናችሁ፣ ለእናንተ አደለን።

የአንቀጹ ትርጉምና ማብራሪያ፦

ይህች አንቀጽ የገነትን ሰዎች የሚጠብቃቸውን የተትረፈረፈ ደስታና የላቀ ክብር ትገልጽልናለች። አላህ ከገነት ሰዎች ልቦች ውስጥ የነበረውን ጥላቻ፣ ቂምና ቅናት ሁሉ አስወግዶ ልቦቻቸውን ንጹሕ ያደርጋል። በዚህም ልቦቻቸው በፍቅር፣ በአንድነትና በሰላም ይሞላሉ። ከእግሮቻቸው ሥር ወንዞች ይፈስሳሉ፤ ይህም የደስታቸውንና የውበታቸውን መጠን ይጨምራል።

ከዚያም የገነት ሰዎች ሁሉን የሚያስደስት የምስጋና ቃል ይናገራሉ፦ “ምስጋና ሁሉ ለአላህ ይሁን፤ እርሱ ይህን የተትረፈረፈ ጸጋ ያገኘንበትን መንገድ የመራን ነው።” እነሱም በትህትና ይመሰክራሉ፦ “አላህ ባልመራን ኖሮ እኛ በራሳችን በማሰብ ብቻ ወደዚህ ቅን መንገድ መምጣት አንችልም ነበር።” ይህም ሁሉም ጥሩ ሥራና ስኬት በአላህ ፈቃድና መሪነት እንደሚሆን ያስተምረናል።

በዚህ ጊዜ የገነት ሰዎች የአላህ መልእክተኞች በዚህ ዓለም ያበሰሩላቸው ተስፋ ሁሉ እውን ሆኖ ያያሉ፤ የተናገሩትም ሁሉ ፍጹም እውነት እንደነበር ይመሰክራሉ። ከዚያም የክብር ጥሪ ይደርሳቸዋል፦ “ይህች ገነት ናት፤ በምድር ላይ በፈጸማችሁት መልካም ሥራና በነበራችሁት እምነት ምክንያት ውርስ አድርገን ሰጠናችሁ።”

ይህች አንቀጽ ሁለት ታላላቅ ትምህርቶችን ትይዛለች፦ አንደኛው በገነት ውስጥ ልቦች ከጥላቻና ከቅናት ሁሉ ነጻ ሆነው በንጹሕ ፍቅር እንደሚኖሩ ነው። ሁለተኛው ደግሞ የገነት መግቢያ በአላህ ፈቃድና በመልካም ሥራ እንደሚገኝ ነው። ስለዚህ እኛም ልቦቻችንን ከጥላቻና ከቅናት አጽድተን፣ ወደ አላህ በመመለስ፣ መልካም ሥራዎችን በመሥራት ወደዚህች የዘላለም ደስታ ለመግባት እንጣር። አላህ ሁላችንንም ከገነት ሰዎች ጋር አብሮ ያድርገን።