Сура Сад pdf

38:1 Сāд. Шегахь хьехам болчу Къуръанах /дуй боу Ас/:

38:2 хIаъ‚ цатешнарш кураллина чохь а‚ мостагIаллина чохь а бу-кх.

38:3 Мел /дукха/ тIаьхье(-наш) хIаллакйина Оха царал хьалха‚ цара кхойкхура /къинхетам боьхуш/– яцара и /кIелхьарбевлла/ бовдаран хан.

38:4 Цецбевлира уьш шайга шайн юккъера кхерамча варах. Цатешачара элира: "ХIара тIех харцволу бозбуунча ву.

38:5 Цо /дуккха деланийн метта/ цхьа дела хилийтина? И дукха тамаше хIума ду!"

38:6 Царах хьалдолу тоба дIаяхара /олуш/: "Д1аг1о‚ собар а де шайн деланашна тIехь. Баккъалла а, хIара ду дезаш долу хIума.

38:7 Тхуна ца хезна оцунах тIаьхьарчу миллатехь . Иза шаьш кхоьллина хIума а бен дац.

38:8 Цуьнга боссийна хьехам вайна юккъера?" . ХIаъ‚ уьш шеконехь бу-кх Сан хьехамах. ХIаъ‚ цара /хIинца а/ ца Iаьвшина Сан Iазап.

38:9 Ткъа цаьргахь ю веза волчу, /Ша Шен лешна ни1маташ/ шортта луш волчу хьан Кхиош-Кхобучун къинхетаман хазнаш?

38:10 Я церан ду стигалийн а‚ лаьттан а‚ цу шиннан юккъехь долчун а паччахьалла? Хьалаболийла уьш /стигала/ гIирсашца .

38:11 /Пайхамарна дуьхьал вовшахтоьхначу/ тобанех цхьа кIеззиг бIо бу уьш – бохор бу хьуна иза.

38:12 Харцбира /пайхамарш/ царал хьалха Нухьан къомо а‚ Iадаша а‚ хьостамаш долчу ФирIавна а.

38:13 Самудаша а‚ ЛутIан къомо а‚ Айкатан дайша а – цу /ерриг/ тобанаша.

38:14 Массара а харцбира элчанаш – бакъхилира Сан бекхам.

38:15 Х1орш хьовсур ма бац цхьана мохье бен – цунна хан яхъяр хир дац. (И мохь тохар тIаьхьатоттур дац).

38:16 Цара (Маккин ох1лано ца бешаш) элира: "Тхан Кхиош-Кхобург‚ сихде тхуна тхан дāкъа хьесапан де дале".

38:17 Сатоха /ахь‚ хIай Мухьаммад/ цара дуьйцучунна‚ дагаваийта Тхан лай Давуд‚ шегахь ницкъ хилла волу . Баккъалла а, иза т1ех /Далла/ тIевоьрзуш верг вара.

38:18 Оха муьтIахь дира /Давудана/ лаьмнаш – цуьнца цхьаьна тасбихь деш суьйранна а‚ /малх/ кхеташ а.

38:19 Олхазарш а‚ гулдеш /тобанашкахь/ – массо а цунна (Давудана) тIедоьрзу /муьтIахь хиларца цуьнца цхьаьна Далла тасбихь дан/.

38:20 Оха чIагIдира цуьнан паччахьалла‚ делира цунна хьекъалалла а‚ дов къасто хаар а.

38:21 Хьоьга деъний /х1ай элча/ довхойн хабар? Уьш михьрабе хьала ма бевлира /пена т1ехула, не1арехула доцуш/.

38:22 Уьш Давуд волчу чоьхьа бевлира‚ иза царах кхеравелира. Цара элира: "Ма кхера. Ши довхо ву /тхо/. Тхан цхьаберш вукхарна чугIиртина. Кхиэл йе тхуна юккъехь нийсонца‚ харцо ма йēлахь‚ нисде тхо нийсачу новкъа.

38:23 ХIара сан ваша ву‚ цуьнан дезткъе ткъаесна уьстагI бу‚ сан цхьа уьстагI бу. Цо аьлла: "Суна кхачо йе цуьнца ". Иза сол тоьлира девнехь".

38:24 Цо (Давуда) элира: "Хьуна зулам дина цо хьан уьстагI бехарца шен уьстагIашна тIе. Баккъалла а, цхьаьна гIуллакх дечарах дукхахболчара вовшашна гамо йо‚ ийман диллинарш а‚ дика Iамалш йеш берш а боцучара – ма кIеззиг бу уьш!" Давудана хиира Оха ша питане лаьцна хилар. ТIаккха шен Кхиош-Кхобучуьнга гечдар дийхира цо‚ горавуьйжира иза‚ /Далла/ тIевирзира иза.

38:25 Оха цунна иза гечдира . Баккъалла а, цунна Тхоьгахь гергарло а ду‚ хаза тIетовжийла а ю.

38:26 ХIай Давуд! Оха хилийтина хьох лаьттахь халип . Кхиэл йе нахана юккъехь нийсонца‚ тIаьхьа ма хIотта дезаршна – цара тилор ву хьо Делан некъах. Баккъалла а, Делан некъах тилалуш берш – царна чIогIа Iазап ду цара хьесапан де дицдарна.

38:27 Оха эрна ца кхоьллина стигал а‚ латта а‚ цу шиннан юккъехь мел дерг а. Иза цатешачеран моттар ду . Бāла бу цатешачарна /жоьжахатин/ цIергара.

38:28 Я Оха хуьлуьйту ийман диллинарш а, дика Iамалш йинарш а лаьттахь боьхалелачарах тера? Я Оха хуьлуьйту /Делах/ кхоьруш берш къинош дечарах тера? /Х1ан-х1а, хуьлуьйтур бац/

38:29 Жайна ду /хIара Къуръан, х1ай элча/‚ Оха ша хьоьга доссийна‚ беркате долуш‚ цаьрга цуьнан аятех ойла яйта‚ хьекъал долчарна дагадаийта.

38:30 Оха велира Давудна Сулейман – дика лай. Баккъалла а, иза сов /Далла тIе/ т1евоьрзуш верг ву /1ибадат дарехь/.

38:31 Цунна (Сулейманна) гайтира суьйранна берг туху /кха кога тIехь хIотталуш/ говраш.

38:32 Цо элира: "Баккъалла а, суна дукхадийзи ниIмат сан Кхиош-Кхобург хьехорал кирхьаца /малх/ дIахьулбаллалц.

38:33 Схьаялаел уьш суна тIе!" Волавелира иза /урс/ хьекха настарех а‚ логех а.

38:34 Оха питане лецира Сулейман - цуьнан гIанта тIе цхьа дегI диллира Оха‚ тIаккха иза /тōба дарца Тхуна/ тIе вирзира.

38:35 Цо элира: "/Веза/ Дела‚ гечдехь суна‚ ло суна паччахьалла, сол тIаьхьа цхьанна хир доцчу тайпана. Баккъалла а, хьо ву-кх т1ех дукха луш верг".

38:36 Оха муьтIахь бира цунна мох‚ байн лелаш цуьнан омранца цунна луучу‚

38:37 шайтIанаш а – массо а гIишлоярхо а‚ хIорда буха воьдург а (маржанаш лоьхуш)‚

38:38 вуьш а‚ дихкина долу буржалшкахь.

38:39 /Оха элира цуьнга/: "ХIара – Тхан совгIат ду. Д1ало /хьан совг1атах рицкъ хьан дōлахь болчарах хьайна луучунна/ я /ца луш/ сацаде /хьайна луучунна/, цхьа а хьесап а доцуш".

38:40 Баккъалла а, цунна Тхоьгахь гергарло а ду‚ дика тIетовжийла а ю.

38:41 Дагаваийта Тхан лай Аййуб‚ иза кхайкхира шен Кхиош-Кхобучуьнга: "Баккъалла а, со схьалаьцна шайтIано халонца а‚ Iазапца а".

38:42 /Элира цуьнга/: "Тоха хьайн ког ! ХIара – шийла лийчар а ду‚ малар а ду" .

38:43 Оха д1абелира цунна шен доьзал а‚ кхин цаьрца цхьаьна оццул Тхоьгара къинхетам а хилла‚ хьекъал долчарна хьехам а хилла .

38:44 /Оха элира цуьнга/: "Схьаэца хьайн куьйга цIов ‚ иза тоха‚ хьайн дуй къера ма хилийта!" Баккъалла а, Тхуна иза карийра собаре. Дика лай ву. Баккъалла а, иза сов /Далла тIе/ воьрзуш верг ву.

38:45 Дагабаийта Тхан леш ИбрахIим‚ Исхьакъ‚ ЙаIкъуб‚ шайгахь ницкъ хилла болу /Далла Iибадат дарехь/‚ тидамалла а хилла болу /дин кхочушдарехь/.

38:46 Оха цIанбира уьш цIеначу Iалашонна – /эхартан/ цIа дагадаийта.

38:47 Баккъалла а, уьш Тхан гергахь хаьржинчарах‚ дикачарах бу.

38:48 Дагабаийта (хьахабе) ИсмаIил а‚ АльясаI а‚ Зуль-Кифл а – берриге а дикачарах бу.

38:49 ХIара хьехам бу. Баккъалла а, /Делах/ кхоьручарна дика тIевоьрзийла ю.

38:50 Iаднан бошмаш ю царна‚ /шайн/ неIарш дIайиллина йолу.

38:51 Тевжина 1аш /хир бу уьш/ цигахь‚ цара схьабоьхуш (царна т1екхоьхьуш) цу чохь дуккха стоьмаш а‚ малар а /хир ду/.

38:52 Царна хир бу бIаьргаш готта болу‚ цхьана хеннара болу /мехкарий/.

38:53 ХIара ду-кх шуна /дуьненахь долуш/ хир ду аьлларг хьесапан денна .

38:54 Баккъалла а, хIара Тхан рицкъ ду‚ цунна кхачадалар дац.

38:55 ХIара! Баккъалла а, /Делан/ дозанах бевллачарна вон тIевоьрзийла ю-кх!

38:56 Жоьжахати – цу чохь богур бу уьш – ма вон /дIавуьжу/ мотт бу-кх /иза/!

38:57 ХIара /Iазап/ Iовшийла цара‚ и ду ц1ийдина хи а‚ ноткъа а.

38:58 Кхин а‚ цуьнан кепара‚ тайп-тайпана /Iазапаш хир ду царна/.

38:59 ХIара тулгIе ю шуьца цхьаьна /жоьжахатина/ чу йоьдуш. "Марша догIийла" (дика т1елацар) дац царна. Баккъалла а, уьш цIергахь богур бу-кх (баьгга чекх ца бовлуш).

38:60 Цара (шаьш къиношдинчарна т1аьхьабаьзначара) эр ду: "Х1аъ‚ шуна "марша догIийла" дац-кх. Аш хьалхадаьккхина тхуна хIара (шу бахьанехь кхаьчча тхо жоьжахате). Ма вон чIагIо ю-кх!"

38:61 Цара эр ду: "Веза Дела‚ хIара тхуна хьалхадаьккхинчунна тIетохалахь Iазап шозза цIергахь ".

38:62 Цара элира: "Вайна хIун хилла ца ган божарий ‚ вай шаьш вочарах лоруш хилла болу /дуьненахь/?

38:63 Вай ца дешаш дара царах‚ я /вайн/ бIаьрг царах дIатили?"

38:64 Баккъалла а, иза хьакъ-бакъ ду – жоьжахатин дайша вовшашца къийсар.

38:65 Ахь āла /х1ай пайхамар/: "Баккъалла а, со кхерамча ву. Ма вац цхьа а дела Ша веккъа Цхьаъ волу‚ т1ех нуьцкъала волу АллахI бен.

38:66 Ша стигалийн а‚ лаьттан а‚ цу шиннан юккъехь долчун Да волу‚ Ша веза волу‚ т1ех гечдеш волу".

38:67 Ахь āла: "Иза – сийлахь доккха хабар ду.

38:68 Шу цунах дIадоьрзуш ду.

38:69 Суна ца хили лаккхарчу элех (Далла гергахь долу маликех) лаьцна хаар, уьш къуьйсуш болуш./Āдаман хьокъехь/.

38:70 Суна ваьхьийца хаийтина со билгала кхерамча вуйла".

38:71 Дагадаийта! Хьан Кхиош-Кхобучо аьллера маликашка: "Баккъалла а, Со кхолла воллу адам поппарх.

38:72 Ас иза нисвича‚ цу чу Сан сих са а диллича, цунна /сий деш/ сужуде гIолаш".

38:73 Сужуд дира маликаша массара а

38:74 /цхьа/Иблис юкъарадолуш – цо куралла йира‚ и хилира керстанех.

38:75 Цо (Дала) элира: "ХIай Иблис‚ стен дуьхьало йина хьуна сужуд дан Ас кхоьллинчунна Сан куьйгашца ? Курадаьлла хьо‚ я хьо хилла хьаладала гIертачарах".

38:76 Цо элира: "Со цул (Āдамал) дика ду. Со кхоьллина Ахь цIерах‚ и кхоьллина Ахь поппарх".

38:77 Цо (Дала) элира: "Арадала цу /ялсамане/ чуьра. Баккъалла а, хьо неIалт аьлла /массо а диканах/ хадийнарг ду.

38:78 Баккъалла а, хьуна Сан неIалт ду бекхаман де даллалц".

38:79 Цо (Иблисо) элира: "Веза Дела‚ хан яхйēхь сан уьш (адамаш) юхаденбен де т1екхаччалц". ("Къематде даллалц ца долуьйтуш дитахь со").

38:80 Цо элира: "Баккъалла а, хан яхйиначарах ду-кх хьо!

38:81 Билгалчу хенан де т1екхаччалц". ("Къематде даллалц лийр дац хьо)."

38:82 Цо элира: "Хьан возаллах дуй боу ас: ас тилор ма бу уьш берриге а,

38:83 царах Хьан сов цIена леш боцурш".

38:84 Цо элира: "Баккъалла а, хьакъ-бакъ Ас олу:

38:85 Ас юзор ма ю жоьжахати хьох а‚ хьуна тIаьхьа мел хIоьттинчух а – царах массарах а".

38:86 Ахь āла /цу цатешачаьрга, х1ай Мухьаммад/: "Ас цунах цхьа а мах ца боьху‚ со сайна тIедиллинчарах а вац" .

38:87 Иза (Къуръан) беккъа Iаламашна хьехам бу.

38:88 Шуна хуур ма ду оцунан хабар, цхьа хан яьлча.