Surah Al-Mulk — Aya 27

Ma'anar Kalmomi:

• Zulfah: yana nufin kusanci, wato azabar Allah ta zo kusa da su.
• Si'at wujūhuhum: fuskokinsu sun mũnana, suka baƙi, kuma baƙin ciki ya bayyana a kansu.
• Tadda'ūn: kuna neman gaggawar zuwarta, kuna ƙirãwa da cewa ba za a tãyar da mu ba.

Tafsirin Ayar:

Lokacin da waɗanda suka kãfirta suka ga azabar Allah tana kusantar su, kuma suka gan ta da idanunsu a Ranar Kiyãma, fuskokinsu za su mũnana su baƙi, baƙin ciki da wulãkanci za su rufe su. Sa'an nan kuma za a ce musu don zargi da wulãkanta su: "Wannan ita ce azabar da kuka kasance kuna neman a gaggauta muku zuwarta a duniya, kuna ƙirãwa cewa ba za a tãyar da ku ba, don haka yanzu kun gan ta da idanunku."

Fa'idodin Darasi:

1. Wannan ayar tana nuna mana cewa azabar Allah gaskiya ce, kuma tana zuwa ba tare da wani shakka ba, don haka mu yi imani da ita kuma mu tsare kanmu daga abin da ke kaiwa zuwa gare ta.
2. Tana nuna mana cewa masu ƙirãwa da yin izgili ga al'amarin tashin kiyama za su yi nadama sosai a lokacin da suka ga azabar, amma nadama a wancan lokaci ba ta amfani.
3. Tana ƙarfafa mu mu yi gaggawar tuba da komawa ga Allah kafin mu gamu da wannan yanayi mai muni, kuma mu yi aiki da abin da ke ceton mu daga azabar.
4. Tana nuna mana cewa fuskokin masu kãfirta za su mũnana a Ranar Kiyãma, yayin da fuskokin muminai za su yi kyau da haske, saboda haka mu kasance daga cikin muminai masu aikin alheri.