Surah Al-A'raf — Aya 185

Ma’anonin Kalmomi:

• Mulkut: Mulkin Allah da ikonsa mai girma a cikin sammai da ƙasa.
• Ajaluhum: Ƙayyadaddun lokacin mutuwarsu.
• Hadith: Magana ko littafi da ake karantawa.

Tafsirin Ayar:

Shin waɗannan mutanen da suke ƙaryata ayoyin Allah ba su duba ba da idon tunani da kula a cikin mulkin Allah mai girma da ikonsa a cikin sammai da ƙasa, da dukan abin da Allah ya halitta a cikinsu na dabbobi, tsirrai, da sauran halittu masu ban mamaki? Shin ba su yi tunani ba cewa duk waɗannan halittu suna nuna ikon Mahaliccinsu da girman saninsa? Kuma shin ba su kula ba da cewa ajallinsu na iya zama ya kusato, har su mutu a kan kafircinsu kafin su tuba, su shiga azabar Allah mai raɗaɗi? Idan ba su yi imani da wannan Alƙur’ani mai ɗauke da wa’adi da wa’azĩ ba, to wane littafi ne bayansa za su yi imani da shi? Alhali babu wani littafi bayansa, kuma babu wani annabi bayan Muhammadu (S.A.W.). Saboda haka, babu wata hujja da za ta rage musu face su yi imani da Alƙur’ani.

Fa’idodin Darasi:

1. Yin nazari a cikin halittun Allah na sammai da ƙasa yana ƙara wa mutum imani da ikon Allah da girman saninsa, kuma yana taimakawa wajen kusantar da zuciya ga Mahaliccinta.
2. Tunawa da kusancin ajali yana sa mutum ya yi gaggawar tuba da komawa ga Allah kafin mutuwa ta riskeshi, domin mutuwa ba ta sanar da kowa ba.
3. Alƙur’ani shine babban littafin shiriya na ƙarshe da Allah ya saukar, kuma babu wani littafi bayansa da zai iya jagorantar mutane zuwa ga alheri da tsira.
4. Wa’azin Allah a cikin Alƙur’ani yana cike da hikima da rahama, domin yana tunatar da mutane abin da ke amfaninsu a duniya da lahira, kuma yana buɗe musu hanyoyin alheri da nisantar da su daga cutarwa.