İsra surəsi — Ayə 88

Kəlmələrin mənaları:

• Lə-in ic'təməət – Əgər bir yerə toplaşsalar, yığışsalar.
• Zahiran – Bir-birinə kömək edən, yardımçı olan.

Təfsir:

Ey Peyğəmbər! De ki: Əgər bütün insanlar və cinlər bir yerə toplaşıb, bu Quranın bənzərini gətirmək üçün söz birliyi etsələr, onun gözəl ifadəsi, məna dərinliyi və bəlağətindəki möcüzəvi xüsusiyyətlərinə bənzər bir kitab gətirə bilməzlər. Hətta onlar bir-birinə arxa durub, bütün güclərini və bacarıqlarını bu işə sərf etsələr belə, bu mümkün olmayacaqdır. Bu, Quranın Allah tərəfindən nazil edildiyinin ən böyük sübutudur.

Bu ayə bizə öyrədir ki, Quran Allahın kəlamıdır və onun bənzərini yaratmaq insan və cinlərin gücündən kənardır. Bu, Qurana iman gətirənlər üçün böyük bir şərəfdir – onlar elə bir kitaba tabe olurlar ki, onun misli yoxdur. Ey möminlər! Bu kitaba sarılın, onu oxuyun, anlayın və həyatınıza tətbiq edin. Çünki bu kitab sizin hidayət mənbəyinizdir və qiyamətə qədər heç kim onun bənzərini gətirə bilməyəcəkdir. Bu, Allahın bəşəriyyətə ən böyük nemətidir – bizə doğru yolu göstərən, bizi zülmətdən nura çıxaran bir rəhbərdir.