سورت انعام — آیت 46

د کلمو معناګانې:

• أَخَذَ سَمْعَكُمْ: ستاسو اورېدل له منځه یوسي، یعنې کڼ کړي مو.
• وَأَبْصَارَكُمْ: ستاسو سترګې له منځه یوسي، یعنې ړانده کړي مو.
• وَخَتَمَ عَلَىٰ قُلُوبِكُم: پر زړونو مو مهر ولګوي، نو هېڅ خبره پوهېدل ورته نه شي.
• يَأْتِيكُم بِهِ: هغه څه چې اخیستل شوي وي بېرته یې راولي.
• نُصَرِّفُ الْآيَاتِ: مونږ دلایل او نښې بېلابېلې بیانوو، څو پوه شي.
• يَصْدِفُونَ: له حق څخه مخ اړوي او یې نه مني.

تفسیر:

ای محمده! ته دې مشرکانو ته ووایه: تاسو ما ته خبر راکړئ! که الله تعالی ستاسو غوږونه واخلي او تاسو کڼ کړي، ستاسو سترګې واخلي او تاسو ړانده کړي، او پر زړونو مو مهر ولګوي چې هېڅ خبره پوهېدل ورته نه شي، نو له الله پرته بل څوک معبود شته چې دا ټول اخیستل شوي څه بېرته درته راولي؟ هېڅوک نشته! دا یوازې الله کولای شي.

بیا الله تعالی خپل پیغمبر ته وايي: ته وګوره چې مونږ څنګه خپلې نښې او دلایل بېلابېل بیانوو، څو دوی پوه شي او لار ومومي، خو بیا هم دوی له دې ټولو څخه مخ اړوي او یې نه مني.

فایدې:

• دا چې سمع، بصر او عقل د الله تعالی لوی نعمتونه دي، نو پر موږ لازمه ده چې د دې نعمتونو شکر وباسو او په سمه لار کې یې وکاروو.
• که الله تعالی دا نعمتونه له چا واخلي، نو هېڅوک یې بېرته نه شي ورکولای، نو باید له الله پرته بل چا ته په هیڅ ډول پناه ونه وړو.
• الله تعالی پر بندګانو باندې ډېر مهربان دی، ځکه یې دا نعمتونه پرېښودل دي، نو باید د هغه د احسانونو شکر ادا کړو.
• د حق د منلو لپاره باید زړه خلاص وي، ځکه چې پر زړه د مهر لګېدل د انسان د هلاکت لامل دی، نو باید له داسې کارونو ځان وساتو چې د زړه د سختۍ سبب شي.