Surah At-Tawbah — Aya 105

Ma'anar Kalmomin:

• اعْمَلُوا: Ku yi aiki, wato ku yi abin da kuke so na alheri ko sharri.
• فَسَيَرَى اللهُ عَمَلَكُمْ: Allah zai ga ayyukanku, babu abin da ya 6oyu a gare Shi.
• عَالِمِ الْغَيْبِ وَالشَّهَادَةِ: Wanda ya san abin da ya 6oyu da abin da ya bayyana.

Tafsirin Ayar:

Ya ke Annabi Muhammad (S.A.W.), ka gaya wa waɗanda suka janye daga yaƙi da kuma waɗanda suka tuba daga zunubansu: Ku yi aiki yadda kuke so, amma ku san cewa Allah yana ganin dukan ayyukanku, Manzonsa da muminai ma za su ga ayyukanku a duniya. Babu wani abu da zai 6oyu daga Allah, ko alheri ne ko sharri. Sa'an nan kuma a Ranar Kiyama za a mayar da ku zuwa ga Ubangijinku wanda ya san dukan abin da kuke 6oyewa da abin da kuke bayyanawa, domin ya sanar da ku dukan abin da kuka aikata a duniya, ya kuma yi muku sakamako a kansa. Wannan ayar tana ƙunshe da gargaɗi da tsoratarwa ga waɗanda suka dage a kan ɓata da girman kai.

Fa'idodin da Ake Samu Daga Ayar:

1. Ƙarfafa wa muminai aiki da kyawawan ayyuka, domin sanin cewa Allah yana kallon dukan ayyuka.
2. Tsoratarwa ga masu laifi cewa ayyukansu ba za su 6oyu ba, za su ga sakamakonsu a duniya da kuma a Lahira.
3. Nuna cewa aikin da yake da daraja a wajen Allah shi ne aikin da yake na ibada da biyayya, ba na son rai da bin son zuciya ba.
4. Tunatar da mumini cewa komai na bayyane ne a wajen Allah, don haka ya kamata ya riƙa yin aiki da yake faranta wa Allah rai.
5. Ƙarfafa bege ga masu tuba cewa Allah yana karɓar tubarsu, idan suka gyara ayyukansu, za su sami sakamako mai kyau.