Sura Al-Hajj — Aya 75

Maana za maneno:

• يَصْطَفِي: huchagua na kuteua.
• رُسُلًا: wajumbe (mitume) waliotumwa kwa ujumbe maalum.

Tafsiri ya Aya:

Mwenyezi Mungu (Subhanahu wa Ta'ala) ndiye anayechagua na kuteua miongoni mwa Malaika wake wajumbe, kama vile Jibril, Mikael na Israfil, ambao huwafikishia ujumbe wake Manabii na Mitume. Na pia huchagua miongoni mwa wanadamu Mitume na Manabii, kama vile Ibrahim, Musa, Isa na Muhammad (Swalla Llahu 'alayhim ajma'in), ambao huwafikishia watu ujumbe wa Mwenyezi Mungu na kuwaita kwenye haki na njia iliyonyooka. Mwenyezi Mungu amebainisha kwamba uchaguzi huu ni wake Yeye pekee, anachagua anaye mwona anayestahiki miongoni mwa viumbe wake. Hakika Mwenyezi Mungu ni Mwenye kusikia maneno ya waja wake, na ni Mwenye kuona kila kitu, na anawajua vizuri wale anaowachagua kwa ajili ya utume wake. Yeye anajua yaliyopita na yatakayokuja, na kwake Yeye pekee ndio yanarejea mambo yote.

Faida na Mafunzo kutoka kwenye Aya hii:

1. Uchaguzi wa Mitume ni wa Mwenyezi Mungu pekee: Hii inaonyesha kwamba si kila mtu anaweza kuwa Mtume, bali ni Mwenyezi Mungu anayechagua anaye mwona anayestahiki, kwa hiyo ni wajibu wetu kuwafuata na kuwaamini wale aliowachagua.
2. Uthibitisho wa sifa za Mwenyezi Mungu: Aya inathibitisha sifa za kusikia na kuona kwa Mwenyezi Mungu, ambazo ni kamilifu na hazifanani na za viumbe, na hii inaimarisha Imani ya Muislamu kwa Mola wake.
3. Utukufu wa Mitume na Malaika: Aya inaonyesha hadhi kubwa ya Malaika na Mitume kwa kuwa Mwenyezi Mungu amewachagua miongoni mwa viumbe wake wote, kwa hiyo ni wajibu wetu kuwaheshimu na kuwaamini wote bila kubagua.
4. Kutegemea Mwenyezi Mungu katika mambo yote: Kwa kuwa mambo yote yanarejea kwa Mwenyezi Mungu, basi ni lazima Muislamu amtegemee Yeye pekee na kumwomba msaada wake katika kila jambo.
5. Uthibitisho wa hekima ya Mwenyezi Mungu: Uchaguzi wa Mitume kwa ajili ya kuwaongoza watu unaonyesha hekima ya Mwenyezi Mungu na rehema yake kwa viumbe wake, kwani hakuwacha watu bila waongofu.