Surah Ash-Shura — Aya 9

Ma’anar Kalmomi:

• Aml ittakhazū: A’a, sun ɗauki.
• Min dūnihi: Baicin Allah.
• Awliyā’a: Abokan kariya da taimako waɗanda suke bauta musu.
• Al-Waliyy: Shi ne Mai kula da halittunsa, Mai taimakon muminai.
• Yuḥyī al-mawtā: Yana rayar da matattu (a ranar tashin kiyama).
• Qadīr: Mai iko a kan kome.

Fassara:

Wannan ayar tana nuna musun Allah ga waɗanda suka ɗauki waɗansu abokan kariya baicin Shi, kamar gumaka da shaidanu, suna dogara da su kuma suna neman taimako a gare su. Allah yana cewa: “A’a, sun ɗauki waɗansu majiɓinta baicin Allah?” To, su san cewa Allah Shi kaɗai ne Majiɓinci na gaskiya, wanda yake kula da halittunsa da taimakon bayinsa muminai, yana fitar da su daga duhun kafirci zuwa hasken imani, kuma yana taimakon su a cikin al’amurransu duka. Shi ne ke rayar da matattu a ranar tashin kiyama domin hisabi da sakamako, kuma Shi ne Mai iko a kan kome, babu abin da ya gagara Shi. To, idan suna bukatar majiɓinci, to, Allah ne Majiɓincin gaskiya, kuma ba wani abin bautawa da gaskiya baicin Shi.

Fa’idodi:

1. Imani da cewa Allah Shi kaɗai ne Majiɓinci na gaskiya, kuma duk wanda ya dogara ga Allah, to, Allah zai ishe shi, kamar yadda ya ce: “Kuma duk wanda ya dogara ga Allah, to, Allah ya ishe shi.”
2. Nisantar shirka da ɗaukan waɗansu majiɓinta baicin Allah, domin su ba su da wani amfani ko cutarwa.
3. Tabbatar da ikon Allah a kan kome, wanda ya haɗa da rayar da matattu, wannan yana ƙarfafa imani da tashin kiyama da hisabi.
4. Ayar tana kira ga muminai su dogara ga Allah kawai, su kuma nisanta daga duk wani abin bautawa na ƙarya, domin Allah ne ke iya taimakon su a duk al’amuransu.