സൂറ അൽ-മുത്വഫ്ഫിഫീൻ — ആയത്ത് 17

പദാർത്ഥങ്ങൾ:

• ثُمَّ يُقَالُ: എന്നിട്ട് പറയപ്പെടും
• هَذَا: ഇത്
• الَّذِي كُنتُم بِهِ تُكَذِّبُونَ: നിങ്ങൾ ഏതിനെ നിഷേധിച്ചുകൊണ്ടിരുന്നുവോ അത്

വ്യാഖ്യാനം:

അന്ത്യദിനത്തിൽ കുറ്റവാളികളായ സത്യനിഷേധികൾ നരകത്തിൽ പ്രവേശിച്ചതിനുശേഷം, അവരെ ശകാരിക്കുകയും ശാസിക്കുകയും ചെയ്തുകൊണ്ട് നരകത്തിലെ കാവൽക്കാർ (മലക്കുകൾ) അവരോട് പറയും: "ഇതാ, ഇതാണ് നിങ്ങൾ ഐഹികജീവിതത്തിൽ നിഷേധിച്ചുകൊണ്ടിരുന്ന ശിക്ഷ! നിങ്ങളുടെ ദൂതൻമാർ ഇതിനെക്കുറിച്ച് മുന്നറിയിപ്പ് നൽകിയിരുന്നു, എന്നാൽ നിങ്ങൾ അതിനെ നിഷേധിക്കുകയും പരിഹസിക്കുകയും ചെയ്തു. ഇപ്പോൾ നിങ്ങൾ അത് നേരിൽ കണ്ടുകൊണ്ടിരിക്കുന്നു."

അതായത്, ആ ശിക്ഷ അവർക്ക് നേരിട്ട് കാണിച്ചുകൊടുത്തുകൊണ്ട് അവരെ നിന്ദിക്കുകയാണ്. അവർ ലോകത്തിൽവച്ച് ഈ ശിക്ഷയുടെ വരവിനെ നിഷേധിച്ചിരുന്നു; ഇപ്പോൾ അത് അവരുടെ മുന്നിൽ പ്രത്യക്ഷമായിരിക്കുന്നു. അവരുടെ നിഷേധത്തിന്റെയും ധിക്കാരത്തിന്റെയും ഫലമായി അവർ ഈ ദുരവസ്ഥയിൽ എത്തിപ്പെട്ടു.

പാഠങ്ങളും പ്രബോധനങ്ങളും:

1. സത്യനിഷേധത്തിന്റെ അനന്തരഫലം: സത്യത്തെ നിഷേധിക്കുന്നവർക്ക് അന്ത്യദിനത്തിൽ ലഭിക്കുന്ന നിന്ദയും ശിക്ഷയും എത്ര ഭയാനകമാണെന്ന് ഈ ആയത്ത് വ്യക്തമാക്കുന്നു. അവിടെ അവർക്ക് ഒഴികഴിവ് പറയാനോ മാപ്പ് ചോദിക്കാനോ അവസരം ഉണ്ടാകില്ല.
2. ഖുർആനിന്റെ സത്യസന്ധത: ഖുർആനിൽ അല്ലാഹു അറിയിച്ച എല്ലാ കാര്യങ്ങളും സത്യമാണ്. അതിൽ പറഞ്ഞ ശിക്ഷകളും പ്രതിഫലങ്ങളും ഉറപ്പായും സംഭവിക്കുന്നതാണ്. അതിനാൽ നാം അതിൽ സംശയിക്കരുത്.
3. തിരുത്താനുള്ള അവസരം: ഇഹലോകത്ത് ജീവിക്കുമ്പോൾ നമുക്ക് നമ്മുടെ തെറ്റുകൾ തിരുത്താനും അല്ലാഹുവിലേക്ക് മടങ്ങാനും അവസരമുണ്ട്. അന്ത്യദിനത്തിൽ അത്തരം അവസരം ഉണ്ടാകില്ല. അതിനാൽ ഈ ജീവിതത്തെ വിവേകത്തോടെ ഉപയോഗിക്കണം.
4. അല്ലാഹുവിന്റെ നീതി: അല്ലാഹു ആരോടും അനീതി കാണിക്കുന്നില്ല. ഓരോരുത്തർക്കും അവരവരുടെ പ്രവർത്തനങ്ങൾക്കനുസരിച്ചുള്ള പ്രതിഫലമോ ശിക്ഷയോ നൽകും. നിഷേധികൾക്കുള്ള ശിക്ഷ അവരുടെ സ്വന്തം പ്രവർത്തനങ്ങളുടെ ഫലമാണ്.
5. സത്യവിശ്വാസികളുടെ ഭാഗ്യം: സത്യവിശ്വാസികൾ അല്ലാഹുവിന്റെ വാഗ്ദാനങ്ങളിൽ വിശ്വസിക്കുകയും അതനുസരിച്ച് പ്രവർത്തിക്കുകയും ചെയ്യുന്നതിനാൽ അവർക്ക് സ്വർഗ്ഗവും അല്ലാഹുവിന്റെ തൃപ്തിയും ലഭിക്കും. അവർ ഈ നിന്ദയിൽ നിന്നും ശിക്ഷയിൽ നിന്നും മുക്തരായിരിക്കും.