Sura Aal-Imran — Aya 139

Maana ya maneno:

• وَلَا تَهِنُوا: Msidhoofike wala msilegeze nguvu zenu.
• وَلَا تَحْزَنُوا: Msihuzunike kwa yaliyowapata.
• الْأَعْلَوْنَ: Ninyi ndio wenye kushinda na kuwa juu.
• إِن كُنتُم مُّؤْمِنِينَ: Ikiwa mnaamini kwa kweli.

Ufafanuzi wa Aya:

Enyi Waumini! Msidhoofike wala msilegeze katika kupigana na adui zenu, wala msihuzunike kwa yaliyowapata siku ya Uhud, kama kuuwawa na kujeruhiwa. Kwani ninyi ndio wenye daraja la juu na wenye kushinda, kwa sababu ya Imani yenu kwa Mwenyezi Mungu, na kwa kuwa mnaahidiwa ushindi na msaada wake. Mna daraja la juu duniani kwa kuwa ushindi utakuwa wenu, na Akhera kwa kuingia Peponi. Hivyo, msihuzunike wala msidhoofike, kwa kuwa ninyi ni Waumini waliomwamini Mwenyezi Mungu na ahadi zake kwa waja wake wachamungu.

Faida Zinazotokana na Aya:

• Imani ya kweli ndiyo chanzo cha nguvu na ushindi; mwenye Imani kamili hawezi kudhoofika wala kushindwa.
• Huzuni na udhaifu ni vipingamizi vya ushindi; Muumini anatakiwa kuwa na moyo thabiti na matumaini ya msaada wa Mwenyezi Mungu.
• Ushindi wa kweli si kwa wingi wa watu au silaha, bali kwa Imani na kumtegemea Mwenyezi Mungu.
• Aya inafundisha Muumini kuwa matatizo na misiba yanayompata si mwisho wa kila kitu, bali ni mtihani unaofuatiwa na ushindi na faraja.
• Kuwa na hakika ya ahadi ya Mwenyezi Mungu kwamba waja wake wacha Mungu ndio wenye ushindi, kunampa Muumini utulivu wa moyo na nguvu ya kukabiliana na changamoto zote.