සූරා ඝාෆිර් — ආයාත් 38

වචනවල අර්ථ:

• اتَّبِعُونِ – මා අනුගමනය කරන්න.
• أَهْدِكُمْ – මම ඔබට මග පෙන්වමි.
• سَبِيلَ الرَّشَادِ – යහමඟ, නිවැරදි හා ඍජු මාර්ගය.

අර්ථ කථනය:

ෆිර්අවුන්ගේ පවුලෙන් වූ ඒ විශ්වාසවන්ත මිනිසා තම සගයන්ට අවවාද කරමින් නැවතත් මෙසේ පැවසීය: “මාගේ ජනයිනි! ඔබ මා අනුගමනය කරන්න. මම ඔබට යහමඟ පෙන්වමි. එනම්, අල්ලාහ්ගේ ඒකත්වය වෙත කැඳවන, ඔහුට පමණක් නමස්කාර කරන, ඔහුගේ දූතයන්ව විශ්වාස කරන මාර්ගයයි. එය ලෝකයේදීත් මරණින් මතු ජීවිතයේදීත් සාර්ථකත්වයට මඟ පාදන ඍජු මාර්ගයයි. ඔහු තම ජනයාව අන්ධභාවයෙන් හා නොමඟ යාමෙන් බේරා ගැනීමට උත්සාහ කළේය. මන්ද, ඔවුන් තම ජීවිත විනාශ කර ගන්නා බව ඔහු දුටු බැවිනි. එබැවින් ඔහු ඔවුන්ට අනුකම්පා කරමින් හා කරුණාව දක්වමින්, ඔවුන්ව යහමඟට කැඳවීය. එය ඔවුන්ගේ යහපත සඳහා වූ අවංක උපදෙසක් මිස අන් කිසිවක් නොවීය.

උපදේශන හා පාඩම්:

1. සත්යය වෙනුවෙන් පෙනී සිටීම සහ අයහපත දකින විට අවවාද කිරීම යහපත් ගුණාංගයකි. එය කරන තැනැත්තා තනිව සිටියද, බලවතුන්ට මුහුණ දීමට සිදු වුවද එයින් පසුබැසිය යුතු නොවේ.
2. අනුන්ගේ යහපතට මඟ පෙන්වීම ඉමහත් පින් කමකි. යහමඟට කැඳවන තැනැත්තාට එය අනුගමනය කරන සියල්ලන්ගේ විපාකය හිමි වේ.
3. සැබෑ නායකත්වය යනු භෞතික බලයෙන් හෝ ධනයෙන් නොව, සත්යය හා යුක්තිය වෙත කැඳවීමෙනි. එම නායකත්වය අල්ලාහ්ගේ මාර්ගයට කැඳවීමේදී පමණක් සම්පූර්ණ වේ.
4. අවවාද කරන්නා තම ජනයා කෙරෙහි දයාව හා කරුණාවෙන් පිරි සිතකින් කටයුතු කළ යුතුය. එවිට ඔවුන්ගේ හදවත් ඔහුගේ වදන්වලට නැඹුරු වීමට ඉඩ ඇත.
5. යහමඟ යනු අල්ලාහ්ගේ ඒකත්වය හා ඔහුට පමණක් නමස්කාර කිරීමයි. එයින් මිදීම හා සාර්ථකත්වය ලැබේ. එම මාර්ගය අනුගමනය කරන තැනැත්තා මෙලොවදීත් පරලොවදීත් ජයග්රහණය කරයි.