සූරා අද්-දුඛාන් — ආයාත් 42

වචන අර්ථ:

• إِلَّا مَن رَّحِمَ اللَّهُ: අල්ලාහ්ගේ දයාවට පාත්‍ර වූ අය හැර.
• الْعَزِيزُ: අතිමහත් බලසම්පන්න, කිසිවෙකුටත් පරාජය කළ නොහැකි තැනැත්තා.
• الرَّحِيمُ: අතිශය කරුණාවන්ත, දයානුකම්පිත තැනැත්තා.

අර්ථ විවරණය:

මෙම ආයාව මගින් පැහැදිලි කරනු ලබන්නේ විනිශ්චය දිනයේදී කිසිදු පුද්ගලයෙකුට තවත් පුද්ගලයෙකුගෙන් කිසිදු ප්‍රයෝජනයක් ලබා ගත නොහැකි බවයි. එදින කිසිවෙකුට තම මිතුරෙකු හෝ ඥාතියෙකු වෙනුවෙන් මැදිහත් වීමට හෝ ඔහුට උපකාර කිරීමට නොහැකි වනු ඇත. කෙසේ වෙතත්, අල්ලාහ්ගේ දයාවෙන් ආරක්ෂා වූ විශ්වාසවන්තයින් මෙයින් ව්‍යතිරේකයක් වේ. ඔවුන් තම ජීවිත කාලයේදී කළ යහපත් ක්‍රියාවන්ගෙන් ප්‍රයෝජන ලබන අතර, අල්ලාහ්ගේ අවසරය ඇතිව ඔවුන්ගෙන් සමහරෙකුට අන් අය වෙනුවෙන් මැදිහත් වීමේ අවස්ථාව ද හිමි වේ.

අල්ලාහ් තම සතුරන්ට එරෙහිව පළිගැනීමේදී අතිමහත් බලසම්පන්නයෙකි. කිසිවෙකුට ඔහුගේ දඬුවමෙන් ගැලවීමට හෝ ඔහුව පරාජය කිරීමට නොහැක. එහෙත්, ඔහු තම ගැත්තන්ගෙන් පසුතැවිලි වන්නන්ට හා ඔහුට කීකරු වන්නන්ට අතිශය කරුණාවන්තය. ඔහුගේ දයාව ඔහුගේ කෝපයට වඩා ඉදිරියෙන් සිටී.

උපදේශාත්මක පාඩම්:

1. විනිශ්චය දිනයේදී මිනිසුන් අතර කිසිදු සම්බන්ධතාවයක් ප්‍රයෝජනවත් නොවන බවත්, සෑම කෙනෙකුම තම ක්‍රියාවන්ටම වගකිව යුතු බවත් මෙමගින් අපට වැටහේ. එබැවින් අප මෙලොව ජීවිතයේදී යහපත් ක්‍රියා කිරීමට ඉක්මන් විය යුතුය.
2. අල්ලාහ්ගේ දයාව අතිමහත් බව මෙමගින් අපට පෙනී යයි. ඔහුගේ දයාවෙන් යමෙකු ආරක්ෂා වුවහොත්, එදින කිසිදු බියක් හෝ ශෝකයක් ඔහුට නොවනු ඇත. එබැවින් අප සැමවිටම අල්ලාහ්ගේ දයාව අපේක්ෂා කළ යුතුය.
3. අල්ලාහ් බලසම්පන්න වුවද, ඔහු කරුණාවන්ත බව මෙමගින් අපට වැටහේ. ඔහුගේ බලය ඔහුගේ සතුරන්ට එරෙහිවද, ඔහුගේ දයාව ඔහුගේ මිතුරන්ට හා කීකරු ගැත්තන්ටද හිමි වේ. මෙය අපට අල්ලාහ් කෙරෙහි බිය සහ බලාපොරොත්තුව යන දෙකම ඇති කර ගැනීමට උගන්වයි.
4. මෙම ආයාව අපට අල්ලාහ්ගේ දයාව ලබා ගැනීමට මග පෙන්වයි. එනම්, ඔහුගේ අණපනත් පිළිපැදීම, තහනම් දේවලින් වැළකීම සහ ඔහු වෙත පසුතැවිලි වීමයි.